Қирғизистон ва Тожикистон чегарасида содир бўлган қуролли тўқнашувлар чоғида қирғиз томонидан 37 киши ҳалок бўлди. Бу ҳақда «Кабар» агентлиги Қирғизистон Фавқулодда вазиятлар вазирлиги матбуот хизматига таяниб, хабар берди.
Аввалроқ 24 киши ҳалок бўлгани ва 129 киши яралангани ҳақида хабар берилганди, агентлик маълумотларига кўра, ярадорлар сони ошмаган. Тожикистон билан чегарадош Боткен вилоятида эвакуация бошланган, 136 мингдан ортиқ киши Фавқулодда вазиятлар вазирлиги томонидан хавфсиз ҳудудларга жўнатилган.
Ўз навбатида, Тожикистон расмийлари қурбонлар ва жароҳатланганлар сонини ҳали расман эълон қилмаган. Аввалроқ республика Ички ишлар вазирлиги Қирғизистон томондан ўққа тутишлар оқибатида тожикистонлик тинч фуқаролар ҳалок бўлганини маълум қилганди.
Қирғизистон ва Тожикистон ўртасидаги чегарада вазият 14 сентябрь куни эрталаб кескинлашди. Қирғизистон томони Тожикистон чегарачилари мамлакатнинг Боткен туманига бостириб кирганини, тожик томони эса Исфара туманида чегарачилар ўққа тутилганини маълум қилди.
Чегарада шиддатли жанглар 16 сентябрга ўтар кечаси юз берди. Шу куни эрталаб Тожикистон ва Қирғизистон президентлари Эмомали Раҳмон ва Садир Жапаров ўт очишни тўхтатиш ҳақида келишиб олди, бироқ сал кейинроқ томонлар бир-бирини битимни бузишда айблади.
Изоҳ (0)