Нефть экспорт қилувчи мамлакатлар ташкилоти (ОПЕК) ва унинг қатор ҳамкор давлатлари (ОПЕК+) аъзолари нефть қазиб олишни кунига 100 минг баррелга қисқартиришга келишиб олди. Бу ҳақда CNN хабар бермоқда.
Гуруҳ 5 октябрь куни бўлиб ўтадиган навбатдаги йиғилиш олдидан зарур бўлганда бозор ўзгаришларига муносабат билдириш учун кейинги музокаралар ўтказиш ҳуқуқини сақлаб қолди.
Ишлаб чиқаришни қисқартириш қарори бу йил биринчи марта қабул қилинди. Ёзда АҚШ президенти Жо Байден Саудия Арабистонидан нефть қазиб олишни кўпайтиришни сўраганди.
Июнда давлатлар коронавирус пандемияси даврида нефтга бўлган талабнинг пасайиши таъсирини қоплаш учун июль ва август ойларида нефть қазиб олиш квотасини кунига 648 минг баррелга оширишга келишиб олган.
ОПЕКнинг энг йирик нефть ишлаб чиқарувчиси Саудия Арабистони аввалига бу қадамни қўйишни истамади, аммо охир-оқибат Риёд бир қатор давлатлар Россиядан нефть сотиб олишдан бош тортган вазиятда бозорда танқисликдан қочишга рози бўлди.
ОПЕК+ гуруҳига Нефть экспорт қилувчи мамлакатлар ташкилотининг (ОПЕК) 13 та аъзоси, шунингдек, 10 та ҳамкор давлат киради.
Аввалроқ G7 давлатлари Россия нефтига юқори нарх чегарасини жорий этишга қарор қилгани ҳақида хабар берилганди.
Изоҳ (0)