Neft eksport qiluvchi mamlakatlar tashkiloti (OPEK) va uning qator hamkor davlatlari (OPEK+) a’zolari neft qazib olishni kuniga 100 ming barrelga qisqartirishga kelishib oldi. Bu haqda CNN xabar bermoqda.
Guruh 5-oktabr kuni bo‘lib o‘tadigan navbatdagi yig‘ilish oldidan zarur bo‘lganda bozor o‘zgarishlariga munosabat bildirish uchun keyingi muzokaralar o‘tkazish huquqini saqlab qoldi.
Ishlab chiqarishni qisqartirish qarori bu yil birinchi marta qabul qilindi. Yozda AQSH prezidenti Jo Bayden Saudiya Arabistonidan neft qazib olishni ko‘paytirishni so‘ragandi.
Iyunda davlatlar koronavirus pandemiyasi davrida neftga bo‘lgan talabning pasayishi ta’sirini qoplash uchun iyul va avgust oylarida neft qazib olish kvotasini kuniga 648 ming barrelga oshirishga kelishib olgan.
OPEKning eng yirik neft ishlab chiqaruvchisi Saudiya Arabistoni avvaliga bu qadamni qo‘yishni istamadi, ammo oxir-oqibat Riyod bir qator davlatlar Rossiyadan neft sotib olishdan bosh tortgan vaziyatda bozorda tanqislikdan qochishga rozi bo‘ldi.
OPEK+ guruhiga Neft eksport qiluvchi mamlakatlar tashkilotining (OPEK) 13 ta a’zosi, shuningdek, 10 ta hamkor davlat kiradi.
Avvalroq G7 davlatlari Rossiya neftiga yuqori narx chegarasini joriy etishga qaror qilgani haqida xabar berilgandi.
Izoh (0)