Халқ таълим вазирлиги Андижон ХТБ бошлиғи ҳибсга олиниши юзасидан изоҳ берди

Халқ таълим вазири ўринбосари Темур Комилов 8 август куни АОКАда бўлиб ўтган матбуот анжуманида Андижон ХТБ бошлиғи ҳибсга олиниши юзасидан изоҳ берди. Бу ҳақда «Дарё» мухбири хабар бермоқда.

2022 йилнинг 7 июнь куни Андижон вилоят халқ таълими бошқармаси бошлиғи Азизбек Миркомилов Андижон шаҳри ҳокими Баҳром Ҳайдаровнинг қамоққа олинишига сабаб бўлган жиноий иш — бюджетнинг 48 миллиард сўмини талон-торож қилишда гумондор сифатида ҳибсга олинганди.

Бош прокуратура томонидан олиб борилаётган тергов иши доирасида 37 нафар шахсга нисбатан айблов эълон қилган. Айни кунга қадар етказилган зарарнинг 23 фоизи қопланган.

Халқ таълим вазири ўринбосари Темур Комиловнинг айтиишича, 2020 йилдан бошлаб Халқ таълим вазирлиги коррупцияга қарши кураш мақсадида ички аудитини кучайтириб, тегишли органлар билан биргаликда ишлаган.

«Андижонда 2020 йилнинг бошида 5,9 миллиард сўм аниқланиб, прокуратурага берилганди. Ўша йилнинг ноябрь ойида 25 миллиард сўмлик ўғирликни расман эълон қилгандик. Бу материаллар ҳуқуқ тартибот органларига берилганидан кейин назорат тафтишдан ўтказилади ва тегишли молиявий органлар қайта тафтиш қилади. 33,8 миллиард сўмлик иш судга оширилган», — дейди у.

Темур Комиловнинг айтишичча, шундан сўнг ҳам Андижонда бу каби ҳолатлар тўхтамагани маълум бўлган.

«Вазирликнинг ўзи 2021 йилнинг сентябрь ойига келиб, масофавий таҳлил асосида ўзлаштириш аломати борлигини аниқлади. Бунга ўзимизнинг кучимиз етмади, ‘банк сири‘ деган нарса бор. Биз Ҳисоб палатасига мурожаат қилдик, Улар билан биргаликда текширув ўтказилди, унда яна 11 миллиард сўмдан зиёд пластик картока орқали ўғирлик аниқланди. Бу иш ҳам ҳуқуқ тартибот органларига тақдим этилди. Улар ўзларига берилган ваколат доирасида тергов ишларини амалга оширишди. Терговда давлат молиявий назорат органлари билан биргаликда бевосита вазирликнинг ички аудит вакиллари ҳам иштирок этди. Тергов ишлари ҳозирги кунда якунланиб, уюшган жиноятчилик бўйича судга оширилган, суд органлари белгиланган тартибда жараён якунлач эълон қилишади», — дейди халқ таълим вазири ўринбосари.

Мутасаддининг қўшимча қилишича, амалга оширилган ўғриликни очишга, шу ҳолатни тизимдан йўқ қилиб ташлашга вазирликнинг ўзи ташаббус кўрсатган.