Хоразм ва Тошкент вилоятларида ўқишга киритиш ҳамда ўқишни кўчириб бериш билан боғлиқ фирибгарлик ҳолатлари фош этилди. Бу ҳақда Бош прокуратура ҳузуридаги департамент хабар берди.
Департаментнинг Хоразм вилоят бошқармаси томонидан ИИБ ходимлари билан ҳамкорликда ўтказилган тезкор тадбирда, фуқаро Р.Б. бошқа бир фуқаро С.ни юқори лавозимда ишловчи танишлари орқали Урганч давлат университетига ўқишга киритиб қўйиш эвазига 2 000 долларни олган вақтида ашёвий далиллар ушланган.
Шу каби, Боғот туман бўлими ва вилоят ДХХ ходимлари томонидан ўтказилган тезкор тадбирда, фуқаро Х.М. фуқаро I.нинг Қирғизистондаги ўқишини Тошкент тиббиёт академиясининг Урганч филиалига кўчириб бериш эвазига 3 000 долларни олган олган вақтида ашёвий далиллар ушланган.
Департамент ҳамда ДХХнинг Бекобод шаҳар бўлимлари томонидан ўтказилган тезкор тадбирда эса, фуқаро О.I. фуқаро С.нинг Тожикистон олийгоҳидаги ўқишини Турин политехника университетига кўчириб бериш эвазига 2 000 долларни олган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Мавзуга доир:
Изоҳ (0)