Фарғона вилояти Фурқат туманида ноқонуний олиб кетилаётган 27 минг қути тамаки тўхтатиб қолинди. Бу ҳақда вилоят божхона бошқармаси хабар берди.
Маълумотларга кўра, Фарғона вилояти божхона бошқармаси Контрабандага қарши курашиш бўлими ходимлари томонидан «Андархон» чегара божхона пости, вилоят ДХХ ва ИИБ ходимлари билан ҳамкорликда тамаки маҳсулотларининг ноқонуний олиб кирилишига қарши курашиш йўналишида тезкор тадбир ўтказилган.
Тезкор тадбир давомида Бешариқ–Қўқон йўналишида ҳаракатланаётган фуқаро М.Р. бошқарувидаги Vito кузатувга олиниб, Фурқат тумани ҳудудида тўхтатилиб, белгиланган тартибда холислар иштирокида кўздан кечирилган.
Натижада автомашина юкхонасида четдан ноқонуний олиб кирилаётган, акциз маркалари бўлмаган, умумий қиймати 162 миллион сўмлик 3 турдаги жами 27 000 қути тамаки маҳсулотлари борлиги аниқланган. Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Изоҳ (0)