Farg‘ona viloyati Furqat tumanida noqonuniy olib ketilayotgan 27 ming quti tamaki to‘xtatib qolindi. Bu haqda viloyat bojxona boshqarmasi xabar berdi.

Ma’lumotlarga ko‘ra, Farg‘ona viloyati bojxona boshqarmasi Kontrabandaga qarshi kurashish bo‘limi xodimlari tomonidan “Andarxon” chegara bojxona posti, viloyat DXX va IIB xodimlari bilan hamkorlikda tamaki mahsulotlarining noqonuniy olib kirilishiga qarshi kurashish yo‘nalishida tezkor tadbir o‘tkazilgan.

Tezkor tadbir davomida Beshariq–Qo‘qon yo‘nalishida harakatlanayotgan fuqaro M.R. boshqaruvidagi Vito kuzatuvga olinib, Furqat tumani hududida to‘xtatilib, belgilangan tartibda xolislar ishtirokida ko‘zdan kechirilgan.

Natijada avtomashina yukxonasida chetdan noqonuniy olib kirilayotgan, aksiz markalari bo‘lmagan, umumiy qiymati 162 million so‘mlik 3 turdagi jami 27 000 quti tamaki mahsulotlari borligi aniqlangan. Mazkur holat yuzasidan jinoyat ishi qo‘zg‘atilib, tergov harakatlari olib borilmoqda.