Тошкентнинг Сергели, Янгиҳаёт туманлари ва бошқа қатор ҳудудларида нохуш ҳидларнинг пайдо бўлиши сабабли аҳоли норозилиги кузатилгани сабабли махсус ишчи гуруҳ «Салар» оқава сув тозалаш иншоотига ишлаб чиқариш билан боғлиқ оқова сувларини ташлаётган корхоналарни ўрганди.
«Тошкент шаҳар сув таъминоти» матбуот хизматининг маълум қилишича, ўрганишлар давомида иншоотга юқори ифлосланган, ёқимсиз ва бадбўй ҳидли оқова сув ташлаши эҳтимоли бўлган 30 та корхона рўйхати шакллантирилди.
Ушбу корхоналар Сергели, Яккасарой, Яшнобод, Миробод, Мирзо Улуғбек ва Янгиҳаёт туманларида жойлашган. Айни кунга қадар ишчи гуруҳ томонидан юқоридаги корхоналардан 26 та корхонанинг оқова сув тармоғи ва локал тозалаш иншооти технологик ҳолати ўрганилди.
Ўрганишлар давомида 4 та ишлаб чиқариш корхонасида оқова сувларини белгиланган меъёрларга мутлақо амал қилмаётганлиги аниқланиб, «Кая натурдарме» МЧЖ , «Замон» МЧЖ, «Чарм аттор» МЧЖ, «Хайк Папер» МЧЖлар шаҳар оқова сув тамоқларидан узиб қўйилган.
Таъкидланишича, барча ўрганилган корхоналардан лаборатория таҳлиллари учун намуналар олинди. Меъёрдан юқори ифлосланган оқова сув учун компенсация тўловлари қўлланилмоқда. Корхоналар раҳбарлари эса келгусида белгиланган технологик меъёрларга тўлиқ амал қилиш бўйича огоҳлантирилди.
Изоҳ (0)