Наманганда собиқ куёв қайнотаси билан можарога аралашган фуқарони ўлдириб қўйди. Бу ҳақда «Дарё» мухбири хабар бермоқда.
Ҳодиса 2022 йил 12 июль куни Наманган туманининг «Ғайрат» маҳалласида рўй берди. Шу куни ушбу маҳаллада яшовчи Илҳом Қодировнинг (исм-шарифлар шартли) хонадонига Наманган шаҳрининг Давлатобод туманида истиқомат қилувчи икки нафар таниши меҳмонга келади. Улар ўзаро гурунг қилиб турган пайт даврага хонадон қўшниси, меҳмонлардан бирининг собиқ куёви 54 яшар Нодир Мақсудов қўшилади ва биргаликда спиртли ичимликлар истеъмол қилишади.
Шу аснода Нодир Мақсудов собиқ қайнотаси Тоҳир Муҳсинов билан эски оилавий можаролар сабаб сан-манга боради ва уни дўппослашга тушади. Қайнотанинг шериги, 1958 йилда туғилган Тўлқин Дадабоев уларни ажратмоқчи бўлганида эса хонадондаги қурилиш ишларида фойдаланиш учун олиб келинган бетон ғишт билан бошига уради.
Т.Дадабоев бошига берилган зарба оқибатида жиддий жароҳат олади. Тез тиббий ёрдам кўрсатиш учун туман тиббиёт бирлашмасига олиб кетилаётган пайт оламдан ўтади.
Мазкур жиноятга қўл урган собиқ куёв тез орада қўлга олинди. Туман прокуратураси томонидан Нодир Мақсудовга нисбатан Жиноят кодексининг 97-моддаси 2-қисми билан жиноят иши қўзғатилиб, қамоққа олинди.
Наманган туманидаги Қумқўрғон маданият саройида ушбу жиноят муҳокамасига бағишланган йиғилиш бўлиб ўтди. Унда вилоят ҳокими Шавкат Абдураззақов, вилоят прокурори Бектош Сайипов ва вилоят ИИБ бошлиғи Шавкат Раҳмонов иштирок этиб, мазкур ҳолат ва уни юзага келтирган омиллар юзасидан фикрларини билдирди. Тумандаги криминоген вазият ва маҳалла масъуллари зиммасига юклатилган вазифаларнинг ижроси танқид остига олинди.
Мавзуга доир:
Изоҳ (0)