АҚШ ҳарбийлари ИШИД террор ташкилоти етакчиларидан бирини йўқ қилишга муваффақ бўлгани ҳақида хабар берди, деб ёзмоқда Reuters.
АҚШ Марказий қўмондонлиги баёнотида айтилишича, жангари гуруҳнинг етакчи бешлигидан бири бўлган Маҳер ал-Агал Сурия шимоли-ғарбида дрон ҳужуми оқибатида ҳалок бўлган, унинг яқин иттифоқчиси эса оғир яраланган.
Ал-Агал Ироқ ва Суриядан ташқарида ИШИД тармоқларини ривожлантириш учун масъул бўлган.
«Операция пухта режалаштирилган эди ва муваффақиятли амалга оширилди. Дастлабки текширув тинч аҳоли орасида қурбонлар йўқлигини кўрсатди», — дейилади хабарда.
Эслатиб ўтамиз, аввалроқ АҚШ президенти Жо Байден Америка махсус кучлари ИШИД раҳбари Абу Иброҳим ал-Ҳошимий ал-Қурайшини йўқ қилгани ҳақида эълон қилганди.
Кейинроқ маълум бўлишича, 13 нафар тинч аҳоли (улардан олти нафари болалар) АҚШ ҳарбийларининг Суриядаги махсус операцияси қурбони бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)