Кучли ёмғир сабаб Покистоннинг Карачи шаҳрини сув босди (фото)

Кучли ёмғирлар Покистоннинг молиявий пойтахти Карачида катта сув тошқини ва вайронагарчиликка олиб келди. Бу ҳақда Reuters хабар берди.

Синд провинциясининг бош вазири Мурод Али Шоҳнинг айтишича, ерости ўтиш жойларининг аксарият қисми сув остида қолган ва тошқиндаги сувларни қуядиган жой йўқ. Унинг сўзларига кўра, уч соат ичида мисли кўрилмаган 126 миллиметр ёмғир ёғган.

Мудофаа маъмуриятининг турар жой мажмуаси ва элита маҳаллалардаги кўчалар ҳам сув остида қолган. Охирги муссон ёмғирлари оқибатида бир кишининг ҳалок бўлгани тасдиқланди, бунга қадар ўтган ой бошидан буён 29 кишининг ўлими қайд этилган.

Молия институтлари ва банк штаб-квартираси жойлашган Карачининг марказий кўчалари, жумладан, Покистон марказий банки ҳам сув остида қолган, қутқарув хизматлари қамалиб қолган одамларга етиб бориш учун қайиқлардан фойдаланган.

Покистон ҳарбий-денгиз кучлари ҳам қутқарув операцияларида иштирок этмоқда, дейилади ҳукумат баёнотида. Денгиз кучлари ва маҳаллий ҳокимият вакиллари жабрланган қишлоқлардан 500 га яқин одам ва маҳаллий амалдорларни қутқарди, деди ҳукумат матбуот котиби Фарҳан Сулемон Ранжхо.

Бош вазир Шаҳбоз Шариф Twitter’даги саҳифасида «Карачида кучли ёмғирлар сабаб юзага келган фожиали талафотдан чуқур қайғудаман» деб ёзди. У Карачи маъмуриятига барча ёрдамни таклиф қилди.

Бундан ташқари, Балужистон провинциясининг жануби-ғарбида жойлашган Ласбела туманидаги ўнга яқин қишлоқлар Виндер дарёсининг тошиши туфайли сув остида қолган. Метрология бошқармаси яқин кунларда ёмғир янада кўпроқ ёғишини прогноз қилмоқда.