Коронавирусга гумон қилинган аҳолига, шунингдек, COVID-19 инфекцияси аниқланган беморларга тиббий ёрдам кўрсатиш учун Тошкент шаҳрининг барча 12 та туманида битта махсус поликлиника фаолиятини қайтадан тикламоқда. Бу ҳақда пойтахт ҳокими Жаҳонгир Ортиқхўжаевнинг 24 июндаги қарорида кўзда тутилган.
Тошкентнинг 11 та туманида коронавирусга гумон қилинган шахслар ва инфекцияли беморлар учун 1 тадан махсус поликлиника илк бор 2020 йил июлида ташкил этилган эди. Ҳар бир поликлиникага 3 тадан тиббий бригада бириктирилган. Улар рентген, кислород конденсаторлари, пулсоксиметр, дори-дармон ва тиббиёт воситалари билан таъминланган.
23 июнь куни Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев Ўзбекистонда коронавирус омикрон-штаммининг энг юқумли деб айтилаётган Stealth-Omicron BA.2 варианти аниқланганини маълум қилди.
Ўзбекистонда 22 июнь ҳолатига кўра коронавирус инфекцияси билан касалланганлар сони 239 895 нафарни ташкил этиб, улардан 237 791 нафари (99 фоиз) соғайган, 1 637 нафари (0,7 фоиз) вафот этган. 22 июнда — 98 кишида, 19 июнда — 93 кишида, 18 июнда 108 кишида, 17 июнда 90 кишида, 16 июнда 59 кишида касаллик қайд этилганди.
Изоҳ (0)