Ташқи ишлар вазири вазифасини бажарувчи Владимир Норов 24 июнь Эрон президентининг Афғонистон бўйича махсус вакили Ҳасан Каземи Кумийни қабул қилди. Бу ҳақда ТИВ ахборот хизмати хабар қилди.
Қайд этилишича, учрашувда Афғонистондаги вазият юзасидан фикр алмашилган. Ўзбекистон—Эрон ҳамкорлигининг бугунги ҳолати ва уни ривожлантириш истиқболлари, шунингдек, Афғонистон масаласи бўйича томонларнинг ўзаро ҳамкорлиги муҳокама қилинган. Томонлар Афғонистонни можародан кейин қайта тиклаш, афғон халқига гуманитар ёрдам кўрсатиш ва минтақавий жараёнларга жалб қилиш масалалари бўйича конструктив мулоқотни давом эттиришга тайёрлигини билдирган.
Эрон томони 2022 йил июль ойида Тошкентда ўтказилиши режалаштирилган Афғонистон бўйича халқаро конференция ишида иштирок этишини тасдиқлаган. Мулоқот давомида Ўзбекистон ва Эрон томонидан Афғонистонда инфратузилма, транспорт ва энергетика лойиҳаларини амалга ошириш масалаларига эътибор қаратилган.
Музокараларда Ўзбекистон президентининг Афғонистон бўйича махсус вакили Исматилла Эргашев ҳам иштирок этган.
Изоҳ (0)