Сурхондарё вилояти Жарқўрғон туманида 23 июнь куни Isuzu ва «КамАЗ» юк машиналари ўртасида йўл-транспорт ҳодисаси содир бўлди. Бу ҳақда вилоят Йўл ҳаракати хавфсизлиги бошқармаси хабар қилди.
Қайд этилишича, ҳолат шу куни соат 15:30 ларда Қизириқ тумани «Бўстон» маҳалласи ҳудудидан ўтувчи 4Р-0103 автомобиль йўлининг 29-километрида Шеробод—Жарқўрғон йўналишида содир бўлган. Жарқўрғон тумани «Меҳнатобод» маҳалласида яшовчи фуқаро бошқарувидаги Isuzu билан қарама-қарши йўналишдан ҳаракатланиб келаётган Шеробод тумани «Гулчинор» маҳалласида яшовчи фуқаро бошқарувида бўлган «КамАЗ-53206» юк автомашинасининг ҳаракат йўналишига чиқиб кетган. У юк машинасининг олд қисми билан тўқнашиб, икки автомашинада ёнғин чиққан.
ЙТҲ оқибатида ҳайдовчилар тан жароҳати олиб, туман тиббиёт бирлашмасига мурожаат қилган.
Тегишли тартибда ҳар иккала ҳайдовчи спиртли ичимлик таъсиридан маст бўлганликда гумонланиб, тиббий текширувга таклиф этилган. Аммо Isuzu юк автомашинаси ҳайдовчиси (1985 йилда туғилган) нарколог кўригини рад этган. Ҳозирда судга оид тиббий ва кимёвий экспертизалари тайинланган.
Ҳолат юзасидан терговга қадар текширув ҳаракатлари олиб борилмоқда.
Изоҳ (0)