Андижон вилояти Бўстон тумани ва Қорақалпоғистоннинг Тахтакўпир туманида субсидия маблағини талон-торож қилган корхона раҳбарлари аниқланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Бўстон туман бўлими томонидан терговга қадар текширув ўтказилган. Унда Б.М. ишлаб чиқариш кооперативи раҳбари Р.К. туман Аҳоли бандлигига кўмаклашиш марказига 50 нафар фуқаронинг бандлигини таъминлагани ҳақидаги сохта маълумотлар киритгани аниқланган. У жами 122,5 миллион сўм субсидия маблағини ажратилишига эришиб, талон-торож қилган.
Бундан ташқари, департаментнинг Тахтакўпир туман бўлими томонидан терговга қадар текширув ўтказилган. Унда «Ш.Б.» МЧЖ мансабдор шахслари туман Аҳоли бандлигига кўмаклашиш марказида ишсиз сифатида рўйхатга олинган ва субсидия ажратиш ҳақида мурожаат қилган 16 нафар фуқарога иссиқхона қуриб бериш учун ҳисоб-рақамига ўтказиб берилган 89 миллион сўмни ўзлаштиргани аниқланган. Улар пулларни кредит қарздорлигини сўндиришга ҳамда МЧЖнинг савдо дўконини қуришга сарфлаб, талон-торож қилган.
Ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 207-моддаси (мансабга совуққонлик билан қараш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Мавзуга доир:
- Сергелида аҳолидан коммунал тўловлар учун йиғилган қарийб 100 млн сўмни талон-торож қилган ширкат аниқланди
- Қашқадарёда банк ходимлари 150 нафар фуқаронинг пенсия ва нафақа пулларини талон-торож қилгани аниқланди
- Сирдарёда 21 млн сўм зарарни ҳисоботга киритмаслик учун тадбиркордан пул олган мансабдор ушланди
Изоҳ (0)