Туркия президенти Ражаб Тоййиб Эрдўғон Россия ва Украина раҳбарлари Владимир Путин ва Владимир Зеленский билан бўлғуси мулоқотлари чоғида Украинадан «дон йўлаги» яратиш масаласини муҳокама қилмоқчи, деб ёзади «РБК». Ўз режалари ҳақида Туркия етакчиси Ван шаҳрида ёшлар билан бўлиб ўтган учрашувда гапириб берди.
Эрдўғоннинг сўзларига кўра, у Путин ва Зеленский билан шу ҳафта музокаралар ўтказиш ниятида. Туркия президенти Украинада қамалда қолган дон билан боғлиқ муаммоларни ва «дон йўлаги» яратиш масаласини муҳокама қилмоқчи.
Шу билан бирга, у Туркиянинг ўзида озиқ-овқат хавфсизлигини таъминлаш бўйича муаммолар йўқлигини таъкидлади. «Бутун дунё иқтисодий жиҳатдан боши берк кўчага кириб қолди… Бизда муаммолар йўқ. Бизнинг захирамизда 5 миллион тонна буғдой бор. Биз бу донни учинчи мамлакатларга юбориб, бу бизнесни янги даражага чиқармоқчимиз. Бундай музокаралар аллақачон бошлаб юборилган», — деди Эрдўғон.
Россия махсус операцияси бошланганидан кейин Украина Қора денгиз шимоли-ғарбида кемалар қатнови тўхтатилишини эълон қилди. АҚШ ҳисоб-китобларига кўра, низо бораётган вақт ичида Украина портларида 20 миллион тоннадан зиёд дон тўпланиб қолган. Украина Россияни кемалар чиқиб кетишига тўсиқлик кўрсатишда айбламоқда, БМТ Москвани бандаргоҳларни қамалдан чиқаришга чақирди ва етказиб беришлар иложи йўқлиги туфайли, дунёда озиқ-овқат инқирози чуқурлашиши хавфи ҳақида огоҳлантирди.
Россия томони кемаларнинг чиқиб кетишига халал бермаётганини бир неча марта маълум қилган — улар қирғоқбўйи сувлари украинлар томонидан миналаштирилгани туфайли портлардан чиқиб кета олмаяпти.
Изоҳ (0)