Россияда коронавирус омикрон-штаммининг юқумлироқ бўлган BА.4 варианти аниқлангани тасдиқланди, деб ёзади Meduza «Роспотребнадзор»нинг Эпидемиология марказий илмий-тадқиқот институти геном тадқиқотлари лабораторияси мудири Камил Хафизовга таяниб.
COVID-19 янги вариантининг илк намуналари лабораторияга май охирида берилган эди, деди Хафизов.
Унинг аниқлик киритишича, яқинда чоп этилган тадқиқотлар «вируснинг BА.4 ва BА.5 вариантлари омикроннинг аввалги шаклларига қараганда бироз юқумлироқ эканини» кўрсатган.
Айни вақтда Хафизов қайд этишича, ҳозир Россияда BА.2 варианти ва ундан тармоқланиб чиққан тагвариантлар устунлик қилмоқда, барча янги касалланиш ҳолатларининг қарийб 95 фоизи уларнинг улушига тўғри келади.
Коронавирус омикрон штаммининг BА.4 варианти 2022 йил бошида биринчи марта Жанубий Африка Республикасида аниқланган, баҳорда у Германия, Дания ва Буюк Британия каби бир қатор Европа мамлакатларида тарқалганди.
Тахминларга кўра, омикроннинг ушбу варианти бошқаларига қараганда сал юқумлироқ, бу аввало унинг иммунитетдан яхшироқ қоча олиш, яъни касалланиб ўтган ва эмланган одамларга юқиш қобилияти билан боғлиқдир.
Изоҳ (0)