Қозоғистон президенти Қосим-Жўмарт Тўқаев 17 июнь куни Санкт-Петербург халқаро иқтисодий форумида иштирок этади. Бу ҳақда давлат раҳбари матбуот хизматига таяниб «Интерфакс» хабар берди.
«17 июнь куни Қосим-Жўмарт Тўқаев Владимир Путиннинг таклифига биноан Санкт-Петербург халқаро иқтисодий форумининг 25 йиллик юбилейида иштирок этади», — дейилади хабарда.
Тўқаев форум ялпи мажлисида нутқ сўзлаши, шунингдек, қатор икки томонлама учрашувлар ўтказиши режалаштирилган, дея қўшимча қилди матбуот хизмати.
Россия президенти матбуот котиби Дмитрий Песков ҳам Тўқаевнинг Россияга ташрифини тасдиқлади. Унинг маълум қилишича, нафақат Қозоғистон раҳбари, балки бошқа хорижий давлат раҳбарлари ҳам форумга ташриф буюради.
«Ҳа, ҳақиқатан ҳам президент Тўқаев форумда иштирок этишини маълум қилди. Биз қозоғистонлик дўстларимиз, ҳамкорларимиз ва иттифоқчиларимиздан ушбу иштирок учун жуда миннатдормиз. Бошқа иштирокчиларга келсак, улар ҳам тадбирда бўлишади», — деди Дмитрий Песков «ТАСС» мухбири билан суҳбатда.
Песков форумда бошқа айнан қайси етакчилар иштирок этишни ошкор қилмади.
Санкт-Петербург халқаро иқтисодий форуми 15—18 июнь кунлари Санкт-Петербургда бўлиб ўтади. Шаҳар губернатори Александр Бегловнинг айтишича, форумда иштирок этиш учун 69 давлатдан делегациялар ариза топширган.
Изоҳ (0)