Turkiya prezidenti Rajab Toyyib Erdo‘g‘on Rossiya va Ukraina rahbarlari Vladimir Putin va Vladimir Zelenskiy bilan bo‘lg‘usi muloqotlari chog‘ida Ukrainadan “don yo‘lagi” yaratish masalasini muhokama qilmoqchi, deb yozadi “RBK”. O‘z rejalari haqida Turkiya yetakchisi Van shahrida yoshlar bilan bo‘lib o‘tgan uchrashuvda gapirib berdi.
Erdo‘g‘onning so‘zlariga ko‘ra, u Putin va Zelenskiy bilan shu hafta muzokaralar o‘tkazish niyatida. Turkiya prezidenti Ukrainada qamalda qolgan don bilan bog‘liq muammolarni va “don yo‘lagi” yaratish masalasini muhokama qilmoqchi.
Shu bilan birga, u Turkiyaning o‘zida oziq-ovqat xavfsizligini ta’minlash bo‘yicha muammolar yo‘qligini ta’kidladi. “Butun dunyo iqtisodiy jihatdan boshi berk ko‘chaga kirib qoldi… Bizda muammolar yo‘q. Bizning zaxiramizda 5 million tonna bug‘doy bor. Biz bu donni uchinchi mamlakatlarga yuborib, bu biznesni yangi darajaga chiqarmoqchimiz. Bunday muzokaralar allaqachon boshlab yuborilgan”, — dedi Erdo‘g‘on.
Rossiya maxsus operatsiyasi boshlanganidan keyin Ukraina Qora dengiz shimoli-g‘arbida kemalar qatnovi to‘xtatilishini e’lon qildi. AQSH hisob-kitoblariga ko‘ra, nizo borayotgan vaqt ichida Ukraina portlarida 20 million tonnadan ziyod don to‘planib qolgan. Ukraina Rossiyani kemalar chiqib ketishiga to‘siqlik ko‘rsatishda ayblamoqda, BMT Moskvani bandargohlarni qamaldan chiqarishga chaqirdi va yetkazib berishlar iloji yo‘qligi tufayli, dunyoda oziq-ovqat inqirozi chuqurlashishi xavfi haqida ogohlantirdi.
Rossiya tomoni kemalarning chiqib ketishiga xalal bermayotganini bir necha marta ma’lum qilgan — ular qirg‘oqbo‘yi suvlari ukrainlar tomonidan minalashtirilgani tufayli portlardan chiqib keta olmayapti.
Izoh (0)