Американинг Astra Space компаниясига тегишли Rocket 3.3 ўта енгил ракетаси NASA Tropics миссиясининг иккита метеорологик сунъий йўлдошини орбитага олиб чиқа олмади, деб ёзади «РБК». Бунга парвоздан кейин тахминан 10 дақиқа ўтгач, иккинчи поғона двигатели ишдан чиқиши сабаб бўлди.
Rocket 3.3 12 июнь куни 13:43 да (Тошкент вақти билан 22:43 да) Флоридадаги Канаверал бурнида жойлашган Кеннеди номидаги космик марказнинг 46-старт мажмуасидан учирилганди. У орбитага NASA’нинг тропик циклонларни кузатиш учун мўлжалланган олтита сунъий йўлдошидан илк иккитасини олиб чиқиши керак эди.
«Биринчи поғонанинг парвози одатдагидек кечди. Бироқ иккинчи поғона вақтидан аввалроқ ўчиб қолди, ва биз юкларни орбитага етказа олмадик», — дейилади Astra хабарида.
NASA қайд этишича, муваффақиятсизликка қарамай, миссия илмий вазифаларни иккита орбита бўйлаб тақсимланган тўртта сунъий йўлдош билан бажаради. Уларни кейинроқ учириш режалаштирилмоқда.
Астра ракетаси учта муваффақиятсиз парвоздан кейин 2021 йил ноябрида биринчи марта муваффақиятли учирилган эди. 2022 йил февралида Rocket 3.3 элтувчи ракетаси, техник муаммолар туфайли бир неча марта кечиктирилган парвозни ниҳоят, амалга оширган, аммо парвоздан кейин 3,5 дақиқа ўтиб, двигателнинг иккинчи поғонаси билан алоқа йўқолган эди. Шу тариқа, у NASA миссияси доирасида учта ихчам сунъий йўдошни орбитага чиқара олмаганди.
Astra ўз ракеталарини тежамкор деб баҳолайди. Битта старт қиймати 2,5 миллион долларни ташкил этади. Оғир синфдаги Falcon 9 ракетасини учириш 60 миллион доллардан зиёдга тушади. Rocket — бешта двигателга эга икки поғонали ракета, у 500 километрли қуёш-синхрон орбитасига 150 килограммгача фойдали юк олиб чиқа олади.
Изоҳ (0)