Европа Иттифоқи Туркияни Украинадаги вазият бўйича Брюссель сиёсатига мос келадиган қатъийроқ позицияда бўлишга чақирмоқда. Бу ҳақда Европа комиссиясининг кенгайиш ва қўшничилик сиёсати масалалари бўйича аъзоси Оливер Вархелига таяниб, «Интерфакс» хабар берди.
«Биз Туркиянинг Украинадаги можаронинг кескинлашувини юмшатишдаги конструктив ролини олқишлаймиз. Шу билан бирга, Туркияни Европа Иттифоқига янада мос келадиган кучлироқ позицияни эгаллашга ҳамда Россияга қарши киритилган санкцияларни четлаб ўтишга йўл қўймаслик масаласида ҳушёрроқ бўлишга чақиришда давом этамиз», — деди Вархели Европа Парламентида.
Унинг қўшимча қилишича, Туркиянинг «фаол дипломатияда давом этиши ҳамда Украина билан бирдамлиги» ва у ерда ўт очилишни тўхтатишга қаратилган саъй-ҳаракатлари катта аҳамиятга эга.
Ўтган ҳафта Туркия ташқи ишлар вазири Мевлут Чавушўғли мамлакат Ғарбнинг Россияга қарши санкцияларини қўллаб-қувватламаслигини, бироқ Россия Анқаранинг ёрдами билан чекловларни четлаб ўтишига йўл қўймаслигини айтган эди.
Май ойи охирида Эрдўғон Россия президенти Владимир Путин билан телефон орқали мулоқот қилди ва Анқаранинг Россия, Украина ва БМТ ўртасида Украина ҳудудида мониторинг механизмини шакллантириш бўйича учрашувни қабул қилишга тайёрлигини айтди. У томонлар мазкур ташаббусни қўллаб-қувватлашига умид билдирди.
Изоҳ (0)