Туркияда ниқоб тақиш мажбурияти бекор қилинди

Туркия соғлиқни сақлаш вазири Фаҳриддин Кожа мамлакатда ниқоб тақиш мажбурияти бекор қилинганини эълон қилди. Бу ҳақда у Twitter’да ёзган.

«Ниқоблар энди мажбурий эмас, шифохоналарда тақиш бундан мустасно. Лекин ўтган шунча тажрибадан сўнг, одам гавжум ёпиқ жойларда, айниқса жамоат транспортида фойдаланиш учун ўзимиз билан ниқоб олиб юришимиз мумкин», — деб ёзади Кожа.

У мазкур қарорини коронавирус билан касалланишлар сонининг кескин камайиши билан изоҳлади — кетма-кет уч кун давомида Туркияда 1 мингдан кам одамда вирус аниқланган.

Туркияда охирги сутка давомида 922 кишида COVID-19 қайд этилди, касалликдан уч киши вафот этди, дея хабар бермоқда Anadolu агентлиги Туркия Соғлиқни сақлаш вазирлигига таяниб. Туркиянинг 57,83 миллиондан ортиқ аҳолиси коронавирусга қарши вакцинанинг биринчи дозасини олган, 53,05 миллиондан ортиқ киши тўлиқ эмланган.

Туркияда COVID-19 билан касалланишнинг биринчи ҳолати 2020 йил 11 мартда аниқланган, 26 март куни эса мамлакатда 1,1 мингдан ортиқ ҳолат қайд этилганди. Туркия фуқаролари орасида 2022 йилда кунлик касалланишнинг максимал сони (4 февраль куни) 111 мингга яқинлашди. Мамлакатда мажбурий ниқоб тақиш тартиби 2020 йилнинг май ойида 25 та вилоятда жорий қилинган. Қоидаларни бузганлар жаримага тортилган.

2021 йил апрель ойида Туркия президенти Ражаб Тоййиб Эрдўғон мамлакатда тўлиқ локдаун жорий қилди. Узоқ масофаларга саёҳат қилиш учун чекловлар қўйилди, мактабларда кундузги таълим тўхтатилди, болалар боғчалари ёпилди, жамоат транспортида бандликни 50 фоиздан оширмаслик талаби қўйилди, аксарият муассасалар ёпилди.