Перу Бош прокуратураси президент Педро Кастилёга қарши дастлабки терговни кенгайтирди, бу сафар давлат раҳбари жиноий ҳамжамият тузишда гумон қилинмоқда, деб ёзади Reuters. Президентга нисбатан аввалги терговлар коррупция ва университетда магистрлик даражасини олишда плагиатга йўл қўйгани билан боғлиқ эди.
«Миллий адвокат Пабло Санчес президент Педро Кастилёга нисбатан жиноий ҳамжамиятни ташкил этиш, таъсир ўтказиш ва оғирлаштирувчи ҳолатларда жиноий тил бириктиришда гумон қилиниб, дастлабки терговни кенгайтиришни буюрди», — дейилади агентлик хабарида.
Кастилё билан бирга собиқ транспорт вазири Хуан Сильва ва «Халқ ҳаракати» партиясининг олти нафар депутати жиноий ишда айбланувчи сифатида иштирок этмоқда.
Прокуратура, шунингдек, миллий конституциянинг 117-моддасига амал қилинишини билдирди, унга кўра, Перу президенти ўз ваколати даврида фақатгина давлатга хиёнат, сайловларга тўсқинлик қилиш ёки конституциявий доирадан ташқарида Конгрессни тарқатиб юбориш масалалари бўйича айбланиши мумкин.
Comercio маълумотларига кўра, собиқ бош прокурор Сораида Авалос Кастилёга қарши иккита тергов очган, улар 2026 йилнинг июль ойида президентнинг ваколат муддати тугайдиган вақтгача тўхтатилган. Улардан бири Петро-Перу ва Провíас Наcионал компанияларидаги қонунбузарликлар билан, иккинчиси эса қуролли кучлар ва полициядаги мансабларни ноқонуний ўзлаштириш билан боғлиқ эди.
Аввалроқ Перу президенти террорчиларга алоқадорликда айбланган.
Педро Кастилё 2021 йилнинг 6 июнь куни ўтказилган сайловларда ғолиб бўлганди. У оддий қишлоқ ўқитувчиси бўлган ва ижтимоий ислоҳотлар ўтказиш ҳамда мамлакат бойликларини одилона тақсимлаш ҳақидаги популистик ваъдалари билан аҳолининг энг қашшоқ қатламларининг овозларини қўлга киритган.
Изоҳ (0)