Владимир вилоятининг Покров шаҳридаги колонияда жазо ўтаётган россиялик мухолифатчи Алексей Навальний Москванинг Мешчанский судига «Росфинмониторинг» устидан даъво аризасини киритди. Ариза суд томонидан 21 апрель куни рўйхатга олинган.
«Интерфакс»нинг Навальний адвокатларига таяниб ёзишича, даъво сиёсатчини «Росфинмониторинг» юритадиган экстремист ва террорчилар рўйхатига киритилгани билан боғлиқ.
Навальний ушбу реестрга 2022 йилнинг январида киритилганди. Унинг шериклари — Леонид Волков, Иван Жданов, Любов Собол, Вячеслав Гимади, Георгий Албуров, Руслан Шаведдинов ҳам рўйхатдан ўрин олган.
Тергов қўмитаси ўшанда Навальний ва унинг шериклари давлат ҳокимиятини обрўсизлантириш, ҳокимиятни зўравонлик билан ўзгартириш ва «тартибсизликларга айланадиган норозилик ҳаракатлари»ни ташкил этиш зарурлиги тўғрисида жамоатчилик фикрини шакллантириш мақсадида 2014 йилдан буён турли тузилмалар тузиб келганини маълум қилган. Бу иш бўйича айбланувчиларнинг деярли барчаси чет элда, лекин экспертларнинг тан олишича, Россияда қолган ўнлаб ва ҳатто юзлаб мухолифат тарафдорлари ҳам айбланиши мумкин.
Россия қонунчилигига кўра, «Росфинмониторинг»нинг экстремист ва террорчилар рўйхатига киритилган фуқароларнинг банк ҳисоб рақамлари музлатилади.
Маълумот учун, мухолифатчи Алексей Навальний 2021 йилнинг 17 январь куни Россияга Германиядан қайтиб келди, у ерда қарийб беш ой давомида бўлиб, «Новичок» билан заҳарланганидан кейин даволанди. Тарафдорлари уни кутиб олиш учун Внуково аэропортига келди. У ерда оммавий ҳибсга олишлар бўлиб ўтди, Навальний ўтирган самолёт эса Шереметьевога қайта йўналтирилди. Қўнганидан кейин сиёсатчи қўлга олинди — «Ив Роше» иши бўйича шартли маҳкум мажбуриятларини бузганлиги учун.
18 январь куни Навальний қамаб қўйилди, суд эса тўғридан-тўғри полиция бўлимида ўтказилди. 19 январь куни Навальний томонидан ташкил қилинган Коррупцияга қарши кураш фонди (ККФ) «Путиннинг қасри» ҳақидаги фильмни эълон қилди. У 100 миллион мартадан ортиқ томоша қилинди, ижтимоий тармоқлар эса шу мавзудаги мемларга тўлиб кетди. Ҳукумат унинг қаср эмас, апарт-меҳмонхона эканлигини ва унга Путин эмас, балки унинг дўсти Аркадий Ротенберг эгалик қилишини маълум қилди.
Навальнийнинг тарафдорлари бутун Россия бўйлаб оммавий норозилик акцияларини уюштирди. 23 январь куни тўрт мингдан ортиқ, 31 январь куни беш мингдан ортиқ одам ҳибсга олинди. Кўп йиллардан буён бунақаси бўлмаганди. Федерал телеканаллар «хушмуомала полициячилар» ҳақида ҳикоя қилди, аслида эса улар намойишчиларга қарши дубинка, электрошокер ва кўзни ёшлантирувчи газ қўллаган эди (Кремль буни провокацияга жавоб деб атади).
Акциялардан кейин камида 40 та жиноят иши қўзғатилди. Навальнийнинг сафдошлари Любов Собол ва Кира Ярмиш, шунингдек, сиёсатчининг укаси Олег митингда коронавирусга қарши чораларни бузганлик учун уй қамоғига ҳукм қилинди. Навальнийнинг яна бир сафдоши Леонид Волков ўсмирларни кўча акцияларига жалб қилганлик учун қидирувга берилди.
Москванинг Симонов туманлараро суди 2 февралда Навальнийни «Ив Роше» иши бўйича айбдор деб топиб, унинг жазони колонияда ўташи ҳақида қарор чиқарганди. Москва шаҳар суди 20 февралда қарорни қонуний деб топди ва суд ҳукми кучга кирди.
Навальний ўша ҳукм бўйича колонияда 2,5 йиллик жазони ўтамоқда. 2022 йилнинг мартида Москванинг Лефортово суди Навальнийни фирибгарлик ва судьяни ҳақорат қилишда айбдор деб топиб, 9 йиллик колонияга ҳукм қилди.
Изоҳ (0)