Афғонистон ҳокимияти тепасидаги «Толибон» ҳаракати аҳолига TikTok ижтимоий тармоғига, шунингдек, PlayerUnknown’s Battlegrounds (PUBG) компьютер ўйинига киришни тақиқлади. Бу ҳақда 21 апрель куни ҳаракатнинг расмий вакили Иномулла Самангоний ўзининг Twitter’даги саҳифасида маълум қилди.
«Алоқа ва ахборот технологиялари вазирлигидан ёш авлодни чалғитувчи PUBG ва TikTok номли дастурларни блоклаш талаб этилади», — деди Самангоний ўз постида.
Бундан ташқари, ААТ вазирлигига ахлоқсиз мазмундаги канал ва кўрсатувлар фаолиятига чек қўйиш топширилган.
TikTok — асосий аудиторияси ёшлар бўлган платформа: фойдаланувчиларнинг ўртача ёши 20-24 ёшни ташкил қилади. Ушбу ижтимоий тармоқ Хитойда ишлаб чиқарилган ва у ерда энг кўп оммалашган. Шунингдек, ундан фойдаланувчилар сони бўйича етакчи давлатлар қаторида Афғонистоннинг қўшниси Покистон ҳам бор — у ерда 19 миллиондан ортиқ фаол фойдаланувчи рўйхатга олинган.
34 миллионга яқин аҳоли яшайдиган Афғонистонда эса TikTok’да 300 мингга яқин фаол фойдаланувчи рўйхатга олинган.
Маълумотларга кўра, афғонистонлик TikTok фойдаланувчилари орасида кўплаб «Толибон» аъзолари ҳам бор. Улар турли характердаги видеоларни юклайди — ҳарбий ҳаракатларни тасвирга олишдан тортиб кундалик эскизларгача.
PUBG жанговар ўйини ҳам ёшлар орасида кенг оммалашган.
Аввалроқ «Толибон» бутун Афғонистон ҳудудида кўкнори етиштириш ва гиёҳванд моддалар ишлаб чиқаришни тақиқлаганди. Бунга риоя этмаган шахслар шариат қонунлари бўйича суд қилинади, аниқланган ҳосил эса зудлик билан йўқ қилинади.
Изоҳ (0)