Vladimir viloyatining Pokrov shahridagi koloniyada jazo o‘tayotgan rossiyalik muxolifatchi Aleksey Navalniy Moskvaning Meshchanskiy sudiga “Rosfinmonitoring” ustidan da’vo arizasini kiritdi. Ariza sud tomonidan 21-aprel kuni ro‘yxatga olingan.
“Interfaks”ning Navalniy advokatlariga tayanib yozishicha, da’vo siyosatchini “Rosfinmonitoring” yuritadigan ekstremist va terrorchilar ro‘yxatiga kiritilgani bilan bog‘liq.
Navalniy ushbu reyestrga 2022-yilning yanvarida kiritilgandi. Uning sheriklari — Leonid Volkov, Ivan Jdanov, Lyubov Sobol, Vyacheslav Gimadi, Georgiy Alburov, Ruslan Shaveddinov ham ro‘yxatdan o‘rin olgan.
Tergov qo‘mitasi o‘shanda Navalniy va uning sheriklari davlat hokimiyatini obro‘sizlantirish, hokimiyatni zo‘ravonlik bilan o‘zgartirish va “tartibsizliklarga aylanadigan norozilik harakatlari”ni tashkil etish zarurligi to‘g‘risida jamoatchilik fikrini shakllantirish maqsadida 2014-yildan buyon turli tuzilmalar tuzib kelganini ma’lum qilgan. Bu ish bo‘yicha ayblanuvchilarning deyarli barchasi chet elda, lekin ekspertlarning tan olishicha, Rossiyada qolgan o‘nlab va hatto yuzlab muxolifat tarafdorlari ham ayblanishi mumkin.
Rossiya qonunchiligiga ko‘ra, “Rosfinmonitoring”ning ekstremist va terrorchilar ro‘yxatiga kiritilgan fuqarolarning bank hisob raqamlari muzlatiladi.
Ma’lumot uchun, muxolifatchi Aleksey Navalniy 2021-yilning 17-yanvar kuni Rossiyaga Germaniyadan qaytib keldi, u yerda qariyb besh oy davomida bo‘lib, “Novichok” bilan zaharlanganidan keyin davolandi. Tarafdorlari uni kutib olish uchun Vnukovo aeroportiga keldi. U yerda ommaviy hibsga olishlar bo‘lib o‘tdi, Navalniy o‘tirgan samolyot esa Sheremetevoga qayta yo‘naltirildi. Qo‘nganidan keyin siyosatchi qo‘lga olindi — “Iv Roshe” ishi bo‘yicha shartli mahkum majburiyatlarini buzganligi uchun.
18-yanvar kuni Navalniy qamab qo‘yildi, sud esa to‘g‘ridan to‘g‘ri politsiya bo‘limida o‘tkazildi. 19-yanvar kuni Navalniy tomonidan tashkil qilingan Korrupsiyaga qarshi kurash fondi (KKF) “Putinning qasri” haqidagi filmni e’lon qildi. U 100 million martadan ortiq tomosha qilindi, ijtimoiy tarmoqlar esa shu mavzudagi memlarga to‘lib ketdi. Hukumat uning qasr emas, apart-mehmonxona ekanligini va unga Putin emas, balki uning do‘sti Arkadiy Rotenberg egalik qilishini ma’lum qildi.
Navalniyning tarafdorlari butun Rossiya bo‘ylab ommaviy norozilik aksiyalarini uyushtirdi. 23-yanvar kuni to‘rt mingdan ortiq, 31-yanvar kuni besh mingdan ortiq odam hibsga olindi. Ko‘p yillardan buyon bunaqasi bo‘lmagandi. Federal telekanallar “xushmuomala politsiyachilar” haqida hikoya qildi, aslida esa ular namoyishchilarga qarshi dubinka, elektroshoker va ko‘zni yoshlantiruvchi gaz qo‘llagan edi (Kreml buni provokatsiyaga javob deb atadi).
Aksiyalardan keyin kamida 40 ta jinoyat ishi qo‘zg‘atildi. Navalniyning safdoshlari Lyubov Sobol va Kira Yarmish, shuningdek, siyosatchining ukasi Oleg mitingda koronavirusga qarshi choralarni buzganlik uchun uy qamog‘iga hukm qilindi. Navalniyning yana bir safdoshi Leonid Volkov o‘smirlarni ko‘cha aksiyalariga jalb qilganlik uchun qidiruvga berildi.
Moskvaning Simonov tumanlararo sudi 2-fevralda Navalniyni “Iv Roshe” ishi bo‘yicha aybdor deb topib, uning jazoni koloniyada o‘tashi haqida qaror chiqargandi. Moskva shahar sudi 20-fevralda qarorni qonuniy deb topdi va sud hukmi kuchga kirdi.
Navalniy o‘sha hukm bo‘yicha koloniyada 2,5 yillik jazoni o‘tamoqda. 2022-yilning martida Moskvaning Lefortovo sudi Navalniyni firibgarlik va sudyani haqorat qilishda aybdor deb topib, 9 yillik koloniyaga hukm qildi.
Izoh (0)