АҚШ ҳарбийлари бир гуруҳ украиналик ҳарбий хизматчиларни Киевга топширилган гаубицаларни ишлатишга ўргатишни бошлади. Бу ҳақда АҚШ Мудофаа вазирлигининг юқори мартабали вакилларига таяниб, The Hill нашри хабар берди.
«Гаубица артиллерияси ва улар учун мўлжалланган снарядлар Европага етиб келди, америкалик ҳарбийлар Украина кучларини ундан қандай фойдаланишни ўргатишни бошлади», — дейилади хабарда.
Амалдорнинг сўзларига кўра, 50 дан ортиқ украиналик ҳарбий «Украинадан ташқаридаги номи ошкор этилмаган мамлакат»да ўқитилади, кейин эса улар ўз мамлакатига қайтиб, ҳамкасблари билан ўрганган билимларини бўлишади.
Тахминларга кўра, ушбу украиналиклар гуруҳини ўқитиш ишлари бир ҳафта давом этади.
20 апрель куни Bloomberg агентлиги Пентагонга таяниб, америкалик ҳарбийлар Европа шарқига Украина учун ваъда қилинган гаубицаларни етказиб беришга киришганини маълум қилганди. Мавжуд маълумотларига кўра, гаубицалар АҚШ ҳарбий-транспорт авиацияси ёрдамида Польшага етказилмоқда, у ердан Украина ҳудудига олиб ўтилади.
Defense Оnе нашрининг ёзишича, гап Вашингтон томонидан 800 миллион долларлик янги ҳарбий ёрдам доирасида АҚШ Денгиз пиёдалари корпуси ва армияси арсеналларидан олинган 18 та 155-миллиметрли гаубица ва 40 мингта снарядни етказиш ҳақида кетмоқда.
Апрель бошларида президент Владимир Зеленский АҚШдан «юртини ҳимоя қилиш учун бирор нарса беришни» сўраган эди. Унинг сўзларига кўра, украиналик ҳарбийлар зирҳли нимчалар ва шлемлар ўрнига самолёт ҳамда ракеталар олишни хоҳлайди.
Кейинроқ АҚШ Сенати Украинага ленд-лиз дастури билан қурол етказиб бериш ҳақидаги қонун лойиҳасини маъқуллаганди. Қонун Жо Байденга Украинага қурол ва бошқа ёрдамлар етказиб беришни тезлаштириш имконини беради. Пентагон ҳисоб-китобларига кўра, Жо Байден президентликка келганидан бери Қўшма Штатлар Украинага 2,3 миллиард доллар ҳарбий ёрдам кўрсатган, шундан 1,6 миллиард доллари уруш бошланганидан кейин берилган.
Изоҳ (0)