Украинада Россия томонидан олиб борилаётган «махсус операциянинг» бошланганига деярли икки ой бўлди. Биринчи ҳужум 24 февраль куни амалга оширилган эди. Ушбу даврда ҳар икки томондан минглаб ҳарбийлар ва тинч аҳоли вакиллари ҳалок бўлди. Ўн минглаб одамлар эса жароҳат олди.
Ҳарбий операция вақт ўтиб Донбасс ва Луганск чегараларидан ташқарига чиқишга улгурди.
Украина президенти Владимир Зеленский эса мамлакатни ҳимоя қилишга тайёр барча фуқароларни қуроллар билан таъминлаш бўйича топшириқ берди.
Шундан сўнг бир қатор Ғарб давлатлари ҳамда АҚШ Россияга қарши бир қатор санкцияларни жорий қилишни бошлади. Ушбу чоралар Россия иқтисодиётни таназзулга учратишдан иборат эди.
Минглаб одамлар, асосан, ёш болалар, кексалар ва аёллар, уруш бошланганидан бери ўз уйларини тарк этишга мажбур бўлди.
28 февраль куни Беларусь чегарасида Россия ва Украина вакиллари иштирокида ўқ отишни тўхтатиш мақсадида музокаралар бошланди. Кейинроқ бу каби учрашувлар бошқа ҳудудларда ҳам ташкил этилди. Жумладан, Туркия воситачилигида Украина ва Россия ташқи ишлари вазирлари ўртасида учрашув бўлиб ўтди. Аммо шу кунгача ушбу учрашувлар кутилаётган натижани бергани йўқ. Буча, Харьков каби шаҳарлардаги қонли тўқнашувлар акс этган лавҳалар ҳамда уларнинг оқибатлари эса юракларни ларзага келтиради.
17 апрель куни куни Украина ҳарбийларига қуролларни ташлаш бўйича Москва томонидан ультиматум илгари сурилди. Москванинг таъкидлашича, вайронага айланган Мариупол шаҳри тўлақонли рус қўшинларининг қўлига ўтган.
Таъкидлаш керакки, ҳар қандай урушда у ёки бу томон ўзини ғолиб деб ҳисоблаши мумкин. Аммо, ҳақиқат шуки, урушда ғолиб бўлмайди. Ҳар қандай урушнинг оқибати яқинидан, оиласидан, бор-будидан айрилган оилалардир.
Изоҳ (0)