АҚШ президенти Жо Байден 2021 йилда кўрган даромадларига оид ҳисоботни эълон қилди, деб хабар беради Reuters. Унга кўра, Байден рафиқаси Жилл билан бирга 610,7 минг доллар ишлаб топган.
Ўтган бир йил ичида Байденлар 150,4 минг доллар федерал солиқ тўлаган — даромад солиғи 24,6 фоизни ташкил этади. 17,4 минг доллар хайрияга йўналтирилган бўлиб, унинг 5 минг доллари — Бо Байден номидаги болаларни ҳимоя қилиш фондига тушган.
Байден президентлик лавозимида 378,3 минг доллар ишлаб топган — бу одатдаги 400 минглик кўрсаткичдан кам, чунки у 20 январдан лавозимга киришган. Байденнинг рафиқаси эса ўқитувчи сифатида 67,1 минг доллар ишлаган.
Вице-президент Камала Харрис ҳамда унинг турмуш ўртоғи Дуглас Эмхофф 1,65 миллион доллар ишлаб топган. Улар 523,4 минг солиқ тўлаган ва 22 минг доллар хайрия қилган.
Аввалроқ Россия ҳукумати ва парламенти ҳам 2021 йилда кўрилган даромадлар тўғрисида маълумот берганди. Унга кўра, президент Владимир Путин ўтган йил давомида 10,2 миллион рубль (126 минг доллар) ишлаб топган. Путиннинг йиллик даромадлари ҳар йили деярли бир хил рақамларда акс этади. 2020 йилда президент декларациясидаги даромад 10 миллион рублни, 2019 йилда эса 9,7 миллионни ташкил қилган. 2017 йилда Путин 1500 квадрат метр майдондаги ер участкасини сотгани туфайли унинг йиллик даромади 18 миллион рублдан ошиб кетганди.
Изоҳ (0)