Украина президенти Владимир Зеленский CNN телеканалига берган интервьюсида Россиянинг босқини бошлангандан буён ҳарбий ҳаракатлар оқибатида 2,5 мингдан 3 минг нафаргача украиналик ҳарбий ҳалок бўлганини маълум қилди.
Давлат раҳбарининг сўзларига кўра, яна 10 мингга яқин ҳарбий хизматчи яраланган. «Уларнинг қанчаси омон қолишини айтиш қийин», — дея қўшимча қилади Зеленский.
Украина президентининг таъкидлашича, тинч аҳоли орасидаги қурбонларни баҳолаш қийин, чунки мамлакат жануби ва шарқидаги кўплаб аҳоли пунктлари қамалда ва у ерда қанча одам ҳалок бўлганини билишнинг ҳозирда имкони йўқ.
Украина мунтазам равишда Россия томонининг жанговар йўқотишлари ҳақида маълумотлар бериб келмоқда. 15 апрель ҳолати бўйича Украина Қуролли кучлари бош штаби 20 минг киши ҳалок бўлганини ҳисоблаган. Россия ўз аскарларининг ҳалок бўлгани ҳақида бир марта — 25 март куни хабар берган. Ўшанда уруш бошланганидан бери 1351 нафар россиялик ҳарбий хизматчи ҳалок бўлгани ва яна 3825 нафари яралангани маълум қилинганди.
Бундан олдин Россия Киевдаги марказларга зарба бериш билан таҳдид қилгани, Мариуполда Украинанинг 1026 нафар денгиз пиёдаси таслим бўлгани тўғрисида хабар берилганди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)