AQSH prezidenti Jo Bayden 2021-yilda ko‘rgan daromadlariga oid hisobotni e’lon qildi, deb xabar beradi Reuters. Unga ko‘ra, Bayden rafiqasi Jill bilan birga 610,7 ming dollar ishlab topgan.
O‘tgan bir yil ichida Baydenlar 150,4 ming dollar federal soliq to‘lagan — daromad solig‘i 24,6 foizni tashkil etadi. 17,4 ming dollar xayriyaga yo‘naltirilgan bo‘lib, uning 5 ming dollari — Bo Bayden nomidagi bolalarni himoya qilish fondiga tushgan.
Bayden prezidentlik lavozimida 378,3 ming dollar ishlab topgan — bu odatdagi 400 minglik ko‘rsatkichdan kam, chunki u 20-yanvardan lavozimga kirishgan. Baydenning rafiqasi esa o‘qituvchi sifatida 67,1 ming dollar ishlagan.
Vitse-prezident Kamala Xarris hamda uning turmush o‘rtog‘i Duglas Emxoff 1,65 million dollar ishlab topgan. Ular 523,4 ming soliq to‘lagan va 22 ming dollar xayriya qilgan.
Avvalroq Rossiya hukumati va parlamenti ham 2021-yilda ko‘rilgan daromadlar to‘g‘risida ma’lumot bergandi. Unga ko‘ra, prezident Vladimir Putin o‘tgan yil davomida 10,2 million rubl (126 ming dollar) ishlab topgan. Putinning yillik daromadlari har yili deyarli bir xil raqamlarda aks etadi. 2020-yilda prezident deklaratsiyasidagi daromad 10 million rublni, 2019-yilda esa 9,7 millionni tashkil qilgan. 2017-yilda Putin 1500 kvadrat metr maydondagi yer uchastkasini sotgani tufayli uning yillik daromadi 18 million rubldan oshib ketgandi.
Izoh (0)