АҚШ давлат котиби Энтони Блинкеннинг фикрича, Россиянинг Украина ҳудудидаги махсус ҳарбий операцияси 2022 йил охирига қадар давом этиши мумкин. Бу ҳақда CNN телеканали иккита европалик амалдорга таяниб, хабар берди.
Телеканал суҳбатдошларининг сўзларига кўра, АҚШ ва Европанинг кўплаб расмий шахслари тобора можаро қисқа муддатда тугамайди, деган хулосага келмоқда ва Россия президенти Владимир Путиннинг якуний мақсадлари ўзгаришига ҳеч қандай ишора йўқ.
Шунингдек, манбаларнинг таъкидлашича, амалдорларда Украинадаги вазиятнинг узоқ давом этиши борасидаги фикр «Россия Киевни тезда эгаллаши кутилаётган махсус операциянинг дастлабки кунларидан сезиларли чекингани» фонида шаклланган.
CNN билан суҳбатлашган европалик амалдорларга кўра, Украина шарқидаги жанговар ҳаракатлар тўрт ойдан ярим йилга қадар давом этиши, шундан сўнг «вазият охири берк кўчага кириб қолиши» мумкин.
Россия президенти Владимир Путин 24 февраль куни Украинада «денасификация ва демилитаризация» мақсадида ҳарбий операция бошланганини эълон қилди. Киев Москва билан дипломатик муносабатларни узди ва ҳарбий ҳолат жорий қилди.
13 март куни «Росгвардия» раҳбари Виктор Золотов ҳарбий операция «кутилганидек тез кетмаётганини» маълум қилганди. У бунда «украиналик миллатчиларни» айблаган ва улар тинч аҳоли ортига беркинаётганини таъкидлаган. Шундан сўнг Россия президентининг матбуот котиби Дмитрий Песков ҳеч ким ҳарбий ҳаракатларни «икки кунда» тугатишни режалаштирмаганини айтган.
6 апрель куни Песков Франциянинг LCI телеканалига берган интервьюсида Москва Украинадаги ҳарбий операцияни музокаралар орқали ҳал этишни хоҳлаётганини маълум қилган. Эртаси куни Британиянинг Sky News каналига эса Кремль вакили россиялик ҳарбийлар тез кунларда операция мақсадига эришишларини билдирган.
Россия Мудофаа вазирлиги 15 апрель куни ҳарбий операция давом этиши ва Украина пойтахтидаги туманларга «Калибр» қанотли ракеталари билан зарбалар амалга оширилганини маълум қилган.
Изоҳ (0)