Украинада содир бўлаётган воқеалар оқибатларидан бири турли мамлакатларда озиқ-овқат тақчиллиги бўлиши мумкин, деди Украина президенти Владимир Зеленский Италия парламентидаги видеоалоқа орқали чиқиши чоғида.
«Украина ҳар доим энг йирик озиқ-овқат экспортчиларидан бири бўлган», — деди у.
Бироқ, Зеленскийнинг сўзларига кўра, Украинадаги ҳозирги вазият экин экиш кампаниясига тўсқинлик қилмоқда. Украина президентининг аниқлик киритишича, гап «денгизнинг нариги томонидаги қўшнилар учун зарур» бўлган маккажўхори, ўсимлик ёғи ва бошқа маҳсулотларни етказиб беришдаги узилишлар ҳақида кетмоқда, «нархлар эса аллақачон ошиб бормоқда».
Зеленскийнинг таъкидлашича, жанговар ҳаракатлар оқибатлари кўплаб мамлакатларда сезила бошлаган ва «турли мамлакатлар учун яқинлашиб келаётган очарчилик энг даҳшатлиси бўлади».
АҚШ Қишлоқ хўжалиги бошқармасининг ташқи қишлоқ хўжалиги хизмати маълумотларига кўра, Россия ва Украина дунёдаги энг йирик буғдой етказиб берувчилардан бири ҳисобланади. Июль ойида бошланган 2021/22 йилги мавсумда жаҳон буғдой экспортининг 16 фоизи Россияга, 10 фоизи Украинага тўғри келди. Бу борада энг катта улуш Европа Иттифоқига тегишли — 18 фоиз, кейинги ўринларда 13 фоиз — Австралия, 11 фоиз — АҚШ, 5 фоиз— Ҳиндистон туради.
Украина, шунингдек, маккажўхорининг энг йирик экспортчиларидан биридир. Мамлакатнинг жаҳон экспортидаги улуши 14 фоиз. Кунгабоқар ёғига келсак, ўтган йилларда Россия ва Украинадан ёғ ва тахтакунжаранинг жаҳон экспортидаги улуши тахминан 80 фоизни ташкил этди.
Изоҳ (0)