Финляндия ва Гибралтарда россияликларнинг 22 та яхтаси ушланди

Финляндия Божхона хизмати санкцияларга учраган россияликларга тегишли экани айтилаётган 21 та яхтани ушлаб қолди, деб хабар беради Helsingin Sanomat газетаси.

Reuters агентлигининг ёзишича, Гибралтарда миллиардер Дмитрий Пумпянский тегишли экани тахмин қилинаётган Ахиома яхтаси ушланган.

Маълум қилинишича, агарда яхталар санкцияларга учраган шахсларга экани тасдиқланса, Финляндия ҳукумати ушбу мол-мулкларни «музлатиш» масаласини кўриб чиқади.

Агентликнинг хабар беришича, Ахиома яхтаси Гибралтарда Мальта байроғи остида причалга боғлаб қўйилган. Refinitiv маълумотларига кўра, яхта 27 февраль куни Кариб денгизидаги Антиуа оролини тарк этиб, Атлантикани кесиб ўтган ва 21 март куни Гибралтарга етиб келган.

Европа Иттифоқи, Буюк Британия, АҚШ ва бошқа давлатлар томонидан санкциялар жорий этилгач, Европада россиялик бизнесменларнинг мол-мулклари ва яхталари ушлаб қолинмоқда. Bloomberg агентлиги маълумотларига кўра, сўнгги кунларда Италиянинг ўзида россияликларнинг 780 миллион евролик активлари «музлатилган».

Аввалроқ Европа Иттифоқи томонидан Россияга қарши жорий этилган санкциялар рўйхатига USM Holdings асосчиси Алишер Усмонов ҳам киритилгани хабар қилинганди. Март бошларида Усмоновнинг «Дилбар» яхтаси хатловга олинган. Кейинроқ суперяхта Европа Иттифоқи ва АҚШ санкцияларидан кейин экипаж ходимларини, жумладан, яхта капитанини ишдан бўшатган ва кема Гамбургда қолиб кетадиган бўлган эди.