Ukrainada sodir bo‘layotgan voqealar oqibatlaridan biri turli mamlakatlarda oziq-ovqat taqchilligi bo‘lishi mumkin, dedi Ukraina prezidenti Vladimir Zelenskiy Italiya parlamentidagi videoaloqa orqali chiqishi chog‘ida.
“Ukraina har doim eng yirik oziq-ovqat eksportchilaridan biri bo‘lgan”, — dedi u.
Biroq, Zelenskiyning so‘zlariga ko‘ra, Ukrainadagi hozirgi vaziyat ekin ekish kampaniyasiga to‘sqinlik qilmoqda. Ukraina prezidentining aniqlik kiritishicha, gap “dengizning narigi tomonidagi qo‘shnilar uchun zarur” bo‘lgan makkajo‘xori, o‘simlik yog‘i va boshqa mahsulotlarni yetkazib berishdagi uzilishlar haqida ketmoqda, “narxlar esa allaqachon oshib bormoqda”.
Zelenskiyning ta’kidlashicha, jangovar harakatlar oqibatlari ko‘plab mamlakatlarda sezila boshlagan va “turli mamlakatlar uchun yaqinlashib kelayotgan ocharchilik eng dahshatlisi bo‘ladi”.
AQSH Qishloq xo‘jaligi boshqarmasining tashqi qishloq xo‘jaligi xizmati ma’lumotlariga ko‘ra, Rossiya va Ukraina dunyodagi eng yirik bug‘doy yetkazib beruvchilardan biri hisoblanadi. Iyul oyida boshlangan 2021/22-yilgi mavsumda jahon bug‘doy eksportining 16 foizi Rossiyaga, 10 foizi Ukrainaga to‘g‘ri keldi. Bu borada eng katta ulush Yevropa Ittifoqiga tegishli — 18 foiz, keyingi o‘rinlarda 13 foiz — Avstraliya, 11 foiz — AQSH, 5 foiz— Hindiston turadi.
Ukraina, shuningdek, makkajo‘xorining eng yirik eksportchilaridan biridir. Mamlakatning jahon eksportidagi ulushi 14 foiz. Kungaboqar yog‘iga kelsak, o‘tgan yillarda Rossiya va Ukrainadan yog‘ va taxtakunjaraning jahon eksportidagi ulushi taxminan 80 foizni tashkil etdi.
Izoh (0)