7 март куни маҳаллий вақт билан соат 23:45 ва 8 март соат 03:00 да (Тошкент вақти билан 03:45 ва 07:00) Польшанинг Катовице шаҳри аэропортидан Uzbekistan Airways авиакомпаниясининг Ўзбекистон фуқаролари бўлган навбатдаги махсус рейслари учди, деб хабар бермоқда «Дунё» агентлиги.
Мазкур рейслар орқали яна 429 нафар Ўзбекистон фуқароси (190 ва 239 киши) мамлакатга олиб келинмоқда.
Ўзбекистоннинг Польшадаги элчихонаси маълумотларига кўра, Uzbekistan Airways авиакомпанияси самолётлари ўзбекистонликларни эвакуация қилиш даврида 21 та махсус рейсни амалга оширган. 27 февралдан 8 март тонгига қадар Польшадан махсус бортлар орқали Ўзбекистонга 4537 киши олиб келинган.
Польша ҳудудида Ўзбекистоннинг 300 нафар фуқароси қолмоқда. 8 март куни Катовице аэропортидан Тошкентга яна иккита рейс амалга оширилиши кутиляпти.
Эвакуация даври мобайнида турли сабабларга кўра ўзлари билан зарур ҳужжатлари бўлмаган Ўзбекистон фуқароларига ватанига қайтиш учун 310 та сертификат берилган.
Польшадаги элчихона ходимлари «Карчова» назорат-ўтказиш пункти ва Катовице аэропортидаги қабул қилиш пунктида фуқароларнинг муаммоларини ҳал қилмоқда, уларни аэропортга етиб бориши билан шуғулланяпти, рўйхатларни шакллантирмоқда.
Ўзбекистоннинг Украинадаги элчихонаси фуқароларга Молдовага бориш осонроқ бўлса, ушбу вариантни кўриб чиқишлари лозимлигини билдирганди. Ушбу фуқароларнинг кейинчалик ватанига эвакуация қилинишини ташкил этиш учун элчихона томонидан уларнинг рўйхати ва маълумотлар базаси шакллантирилмоқда.
Украина фуқаролигини олган ёки ўзбекистонликлар билан оила қурган бошқа давлат фуқаролари ушбу давлатдан пуллик асосда эвакуация қилиниши мумкин.
Изоҳ (0)