7-mart kuni mahalliy vaqt bilan soat 23:45 va 8-mart soat 03:00 da (Toshkent vaqti bilan 03:45 va 07:00) Polshaning Katovitse shahri aeroportidan Uzbekistan Airways aviakompaniyasining O‘zbekiston fuqarolari bo‘lgan navbatdagi maxsus reyslari uchdi, deb xabar bermoqda “Dunyo” agentligi.
Mazkur reyslar orqali yana 429 nafar O‘zbekiston fuqarosi (190 va 239 kishi) mamlakatga olib kelinmoqda.
O‘zbekistonning Polshadagi elchixonasi ma’lumotlariga ko‘ra, Uzbekistan Airways aviakompaniyasi samolyotlari o‘zbekistonliklarni evakuatsiya qilish davrida 21 ta maxsus reysni amalga oshirgan. 27-fevraldan 8-mart tongiga qadar Polshadan maxsus bortlar orqali O‘zbekistonga 4537 kishi olib kelingan.
Polsha hududida O‘zbekistonning 300 nafar fuqarosi qolmoqda. 8-mart kuni Katovitse aeroportidan Toshkentga yana ikkita reys amalga oshirilishi kutilyapti.
Evakuatsiya davri mobaynida turli sabablarga ko‘ra o‘zlari bilan zarur hujjatlari bo‘lmagan O‘zbekiston fuqarolariga vataniga qaytish uchun 310 ta sertifikat berilgan.
Polshadagi elchixona xodimlari “Karchova” nazorat-o‘tkazish punkti va Katovitse aeroportidagi qabul qilish punktida fuqarolarning muammolarini hal qilmoqda, ularni aeroportga yetib borishi bilan shug‘ullanyapti, ro‘yxatlarni shakllantirmoqda.
O‘zbekistonning Ukrainadagi elchixonasi fuqarolarga Moldovaga borish osonroq bo‘lsa, ushbu variantni ko‘rib chiqishlari lozimligini bildirgandi. Ushbu fuqarolarning keyinchalik vataniga evakuatsiya qilinishini tashkil etish uchun elchixona tomonidan ularning ro‘yxati va ma’lumotlar bazasi shakllantirilmoqda.
Ukraina fuqaroligini olgan yoki o‘zbekistonliklar bilan oila qurgan boshqa davlat fuqarolari ushbu davlatdan pullik asosda evakuatsiya qilinishi mumkin.
Izoh (0)