Туркманистонда муддатидан олдинги президентлик сайловларини 12 мартда ўтказиш режалаштирилмоқда. Бу ҳақда республика Марказий сайлов комиссияси раисига таяниб, «Интерфакс» хабар берди.
11 февраль куни Туркманистон парламенти олий палатасининг навбатдан ташқари йиғилишида мамлакатни 15 йилдан бери бошқариб келаётган Гурбангули Бердимуҳамедов бошқарувчи ёшларга топшириш ва фаолиятини Халқ маслаҳати раиси сифатида давом эттириш борасидаги ниятини маълум қилган.
Халқ маслаҳатининг навбатдан ташқари йиғилишида сўзга чиққан фахрий оқсоқоллар президент Бердимуҳамедовнинг мамлакат раҳбариятига ёш кадрларни жалб этиш тўғрисидаги қарорини қўллаб-қувватлаган. Кейинроқ у Марказий сайлов комиссиясига муддатидан олдин президентлик сайловларини ўтказишга тайёргарликни бошлаш бўйича топшириқ берган.
Туркманистоннинг амалдаги президенти Гурбангули Бердимуҳамедов 2017 йилнинг 12 февралида давлат раҳбарлиги лавозимига тайинланганди. Ўшанда унга сайловчиларнинг 97,69 фоизи овоз берган — 3 163 692 киши. Давлат раҳбари сайлови муқобиллик асосида ўтказилган, олий давлат лавозимига тўққиз нафар номзод даъвогарлик қилганди.
Туркманистон конституциясига мувофиқ президент 7 йил муддатга сайланади. Навбатдаги президентлик сайловлари 2024 йилда ўтказилиши керак эди.
Эслатиб ўтамиз, 2021 йилнинг мартида Туркманистон президенти Бердимуҳамедов конституцияга зид равишда парламент аъзоси этиб сайлангани хабар берилган эди. 2020 йил сентябрь ойида қабул қилинган янги таҳрирдаги Туркманистон конституциясининг 73-моддасига мувофиқ, президент Туркманистон Миллий кенгашининг аъзоси ёки депутати бўлиши мумкин эмас.
Изоҳ (0)