Россия президенти Владимир Путин ва Франция президенти Эммануэль Макрон 7 февраль куни Кремлда юзма-юз музокаралар ўтказди. Асосан, Украина атрофидаги вазият муҳокама қилинган учрашув беш соат давом этди, бироқ сезиларли ютуққа эришилмади. Афтидан, музокараларнинг энг диққатга сазовор жойи икки давлат президентлари ўртасидаги улкан стол бўлди. Путин ва Макроннинг 4 метрлик стол атрофида ўтириши ижтимоий тармоқларда кўплаб ҳазил ва мемларга сабаб бўлди.
Британиянинг GB News телеканали бошловчиси Колин Брезер «самолёт ташувчи кеманинг ўлчамидаги стол» Путинга нега керак бўлганидан ҳайратланди.
Business Insider’дан Жон Холтивангер столни «кулгили даражада катта» деб атади. Аммо NPR мухбири Элеанор Беардслей истеҳзо билан уни «ихчам ва қулай» деб таърифлади.
Актёр Стивен Хантер («Хоббит» трилогиясидаги Бомбур роли билан танилган) бутун бошли диалогни ўйлаб топди:
— Менимча, мени қаҳвамни адашиб сизга беришди.
— Нима?
— СИЗДА МЕНИНГ…
— Баландроқ гапирсангизчи!
— Майли қўяверинг! Келинг, Украина ҳақида гаплаша…
— Нима деб минғирлаяпти бу?
— Худо ҳаққи, кичикроқ стол қўйинглар!
—ЭШИТМАЙАПMAН.
— Болалар боғчаси…
— ҲА-ҲА-ҲА.
Франциянинг Liberation нашри столни ўз муқовасида акс эттирди.
Ва, албатта, стол мемлар қаҳрамонига айланди.
Кейинроқ Франция президентига яқин икки манбага таяниб, Reuters хабар беришича, етакчиларнинг бундай узоқ масофа сақлаб ўтиришига Макрон Россияда коронавирусга ПЗР-тестини топширишдан бош тортгани сабаб бўлган.
Манбаларнинг сўзларига кўра, Макроннинг олдига танлов қўйилган — россиялик шифокорлар тестидан ўтиш ва Путин билан қисқароқ масофа сақлаб гаплашиш ёки тестни рад этиб, қатъийроқ қоидаларга риоя қилиш.
Reuters суҳбатдошларидан бири Макроннинг хавфсизлик нуқтаъий назаридан Россияда ПЗР тестини топширишдан бош тортишини шундай изоҳлади: «Бу қўл бериб кўришмаслик ва шундай узун столни англатишини яхши тушунардик. Лекин уларга президентнинг ДНКсини олишга рухсат бера олмасдик».
Иккинчи манбанинг қўшимча қилишича, Макрон Россияга ташриф буюришдан олдин Францияда ПЗР тестини топширган, Россияга келганидан кейин эса шахсий шифокори ёрдамида антиген тестидан ўтган.
Изоҳ (0)