11 февраль куни Ашхободда Туркманистон парламенти олий палатасининг навбатдан ташқари йиғилиши бўлиб ўтди. Унда келгуси 30 йил ичида давлатни ривожлантириш режалари муҳокама қилинди, деб хабар беради «Хроника Туркменистана».
«Мана 15 йилдан буён Туркманистон президенти сифатида энг юқори ва ўта масъулиятли лавозимда ишлаб келяпман. Бир вақтнинг ўзида мен Туркманистон Вазирлар Маҳкамаси раиси, Давлат хавфсизлик кенгаши раиси, Туркманистон Қуролли кучлари олий бош қўмондони, Туркманистон халқ маслаҳати миллий кенгаши раиси вазифаларини бажармоқдаман», — деган Бердимуҳамедов.
Давлат раҳбари бундан икки йил олдин «пайғамбар ёши»га тўлганини айтиб, осон бўлмаган қарорни қабул қилганини маълум қилган.
«Мамлакатимиз тараққиётининг янги босқичида давлат бошқарувига элтувчи йўлни маънавий муҳитда ва замоннинг юксак талаблари асосида тарбияланган ёш етакчиларга бериш керак, деган фикрни қўллаб-қувватлайман. Мен Халқ маслаҳати раиси сифатида катта ҳаётий ва сиёсий тажрибамни бундан буён ҳам шу соҳага йўналтириш ниятидаман», — дейди Гурбангули Бердимуҳаммедов.
2021 йилнинг февралида Гурбангули Бердимуҳамедов ўзининг 40 ёшли ўғли Сардор Бердимуҳамедовни бош вазир ўринбосари ва Олий назорат палатаси (молиявий-иқтисодий масалалар бўйича давлат назорати органи) раиси этиб тайинлаган, шунингдек, уни Туркманистон Давлат хавфсизлик кенгаши таркибига киритганди.
Аввал Гурбангули Бердимуҳамедов Хитой матбуотига берган интервьюсида «ягона Хитой» сиёсатини қўллаб-қувватлашини билдиргани, ундан олдин эса бобоси номидаги ҳарбий мактаб қуриладиган жойга капсула қўйгани ҳақида хабар қилинган.
Изоҳ (0)