Украина Вена келишувида кўзда тутилган бўлимга кўра, хавфни камайтириш механизмини қўллади. Бу ҳақда Украина ТИВ раҳбари Дмитрий Кулебага таяниб, «Интерфакс» хабар қилган.
«Россия Федерациясига Украина билан чегара ҳудудларидаги ҳарбий фаолият юзасидан тушунтиришлар беришни сўраб мурожаат қилдик», — деб ёзган Кулеба Twitter’да.
«Вена келишувида белгиланган тартибга кўра, Россия ҳарбий фаолият бошланган ҳудудлар ҳақида аниқ маълумотларни тақдим этиши, унинг тугаш санасидан огоҳлантириши, шунингдек, машғулот номи, ҳарбий гуруҳлар ва аскарлар сонини ошкор қилиши; жалб қилинган ҳарбий қуроллар ва техника турлари ҳақида ахборот бериши керак", — деган Украина ташқи ишлар вазири.
Кулебанинг айтишича, Россиянинг ихтиёрида ушбу сўровга жавоб қайтариш учун 48 соат вақт бор.
«Сўровга жавоб қайтарилмаса ёки етарли даражада зарур ахборотлар берилмаса, Украина Россия ва Вена шартномасига аъзо бошқа мамлакатларга фавқулодда учрашув ўтказиш юзасидан мурожаат қилади, тадбирда Россия бу борада тушунтириш бериши зарур. Украинада хавфсизликни таъминлаш учун барча дипломатик имкониятлардан фойдаланишда давом этамиз», — дея қайд этган Украина ТИВ раҳбари.
Аввал Байденнинг америкаликларни зудлик билан Украинани тарк этишга чақиргани, Буюк Британия ташқи ишлар вазири Украина—Россия уруши фалокатли оқибатларни келтириб чиқариши мумкинлигидан огоҳлантиргани ҳақида хабарлар берилган.
Изоҳ (0)