АҚШ Давлат департаменти Беларусдаги америкалик давлат хизматчиларининг оила аъзоларига мамлакатни тарк этишни буюрди.
«2022 йил 31 январь куни Давлат департаменти АҚШ давлат хизматчиларининг оила аъзоларига мамлакатни тарк этишини буюрди», — дейилади хабарда.
Таъкидланишича, «Россиянинг Украина чегараси яқинида ноодатий ва хавотирли ҳарбий фаоллиги»нинг кучайиши сабаб юзага келадиган вазиятни «олдиндан айтиб бўлмайди ва минтақада кескинлик кучайган».
«Вазиятнинг юқори даражада беқарорлигини ҳисобга олган ҳолда АҚШ фуқароларига Беларусга бормаслик қатъий тавсия этилади», — дейилади АҚШ ташқи сиёсий идораси хабарида. Шунингдек, АҚШ элчихонаси Беларусда бўлиб турган америкаликларга минтақадаги сиёсий ва ҳарбий кескинликка нисбатан хушёр бўлишни тавсия қилган.
«АҚШ фуқароларига оммавий намойишлардан қочиш ва фавқулодда ҳолат содир бўлганда мамлакатни тарк этишнинг мавжуд режаларини мунтазам кўриб бориш тавсия этилади», — дейилган хабарда.
Бир неча кун олдин АҚШ Давлат департаменти Американинг Киевдаги элчихонаси ходимларининг бир қисми, шунингдек, барча ходимларнинг оилалари эвакуация қилинишини маълум қилганди. Бундан ташқари, Давлат департаменти АҚШ фуқароларини Украинага боришдан тийилишга чақирган. Орадан кўп ўтмай АҚШнинг Киевдаги элчихонаси америкаликларни зудлик билан Украинани тарк этишга чақирди.
Мавзуга доир: «Украина — ‘Титаник’ эмас»: Зеленский Ғарб дипломатларининг Украинадан эвакуация қилинишини хато деб атади
Изоҳ (0)