Жанубий Кореяда пандемия бошидан буён илк бор бир суткада коронавирус билан касалланганлар сони 18 мингдан ошиб кетди. Бу ҳақда Жанубий Корея ОАВларига таяниб, «Интерфакс» хабар берди.
Корея Касалликларни назорат қилиш ва олдини олиш агентлиги маълумотларига кўра, сўнгги 24 соат ичида мамлакатда 18,3 мингдан ортиқ одамда коронавирус аниқланган. Бунгача эса кетма-кет уч кундан буён суткасига 17 мингдан ортиқ кишида инфекция қайд этилганди.
Шунингдек, ўтган кун давомида мамлакатда касаллик оқибатларидан 17 нафар киши вафот этган.
Ўтган ҳафта давомида Жанубий Кореяда қайд этилган коронавирусга чалиниш ҳолатларининг 80 фоизи омикрон штаммига тўғри келмоқда. Соғлиқни сақлаш органлари юқори шайлик ҳолатида, чунки мамлакатда Ой тақвими бўйича Янги йилини нишонлаш муносабати билан кунлик касалланишлар сони тез орада 20 000 дан ошиши кутилмоқда.
Жанубий Кореяда пандемиянинг бутун даври давомида 864 мингга яқин кишида коронавирус аниқланган, 6,7 мингдан ортиқ одам вирус қурбони бўлган.
Мавзуга доир:
- Россияда бир суткада 113 минг кишида коронавирус аниқланди — бу пандемия бошидан буён мутлақ рекорд
- Грузияда бир суткада 7,5 минг кишида коронавирус аниқланди — бу пандемия бошидан бери янги антирекорд
- Францияда пандемия бошидан бери янги антирекорд — бир суткада 180 мингга яқин кишида коронавирус аниқланди
Изоҳ (0)