Польша Украинага дронлар, ўқ-дори ва зенит-ракета мажмуаларидан иборат ҳарбий ёрдам юбормоқчи

Польша Украинага ҳарбий ёрдам доирасида «мудофаа мақсадларида» фойдаланиш учун «Гром» кўчма зенит-ракета мажмуаси ва учувчисиз бошқариладиган учиш аппаратларини юборади. Бу ҳақда Польша бош вазири Матеуш Моравескийга таяниб, PAP агентлиги хабар берди.

«Биз Украинага бирламчи зарур нарсалар ва мудофаа қуролларини етказиб бериш орқали ёрдам беришга тайёрмиз», — дейди Моравеский.

Олдинроқ Польша Миллий хавфсизлик бюроси раҳбари Павел Солох мамлакат Украинага ҳужум эмас, балки мудофаа мақсадларида «бир неча ўн минг» қурол-яроғни етказиб бериш ниятида эканини тасдиқлаганди. Гап айнан қайси қуроллар ҳақида кетаётганига аниқлик киритмаганди.

Эслатиб ўтамиз, АҚШ, Буюк Британия, Канада ғарб ОАВларининг Россия Украинага бостириб киришга тайёргарлик кўраётгани тўғрисидаги хабарлари фонида Киевга ёрдам беришини маълум қилган. АҚШ президенти Жо Байден яқин кунларда Шарқий Европага америкалик ҳарбий жўнатилишини билдирган.

Россия бир неча ойдан бери Украина чегараларига қўшин тўпламоқда, бу эса Ғарб давлатларининг Россия Украинага бостириб киришга тайёрланаётгани ҳақидаги тахминларига сабаб бўлмоқда. Москва буни қатъиян рад этиб, қўшинларнинг ўтказилишини машқлар билан изоҳлайди. Ғарб давлатлари Россия Украинага бостириб кирса, унга қарши санкциялар қўллашга ваъда бермоқда.