АҚШ давлат котиби Ғарб Россиянинг Украинага нисбатан сиёсатига жиддий чора кўриши керак деб ҳисоблайди

АҚШ давлат котиби Энтони Блинкен глобал кўламдаги салбий оқибатлардан қочиш учун Ғарб Россиянинг Украина ва минтақадаги бошқа давлатларга нисбатан сиёсатига кескин чора кўриши лозимлигини айтди, деб хабар беради «Коммерсантъ».

У Россияни «халқаро муносабатларнинг асосий тамойилларини» бузишда айблаб, бунга Москванинг Украина, Грузия ва Молдова билан муносабатларни мисол қилиб келтирган.

Блинкеннинг айтишича, «Украинанинг мустақиллик ҳуқуқи билан боғлиқ хавотирлар бир четга суриб қўйилган тақдирда ҳам, тинчлик, хавфсизликни сақлаш ва можароларнинг олдини олишни таъминлайдиган халқаро муносабатларнинг асосий тамойиллари мавжуд».

«Агарда биз халқаро муносабатларнинг ушбу базавий тамойиллари бузилишига йўл қўйсак, ‘Пандора қутиси'ни очиб юборамиз ва бу бутун дунё учун хавф туғдиради. Бу бизни бўлиниш, можаролар ва ҳатто энг ёмони — йиллар давомида олдини олишга интилган бундан ҳам ёмонроқ вақтга қайтаради. Шу сабабли тикилган дов Украина тақдиридан юқори, Европанинг Россия, АҚШнинг Россия билан муносабатларидан ҳам юқори. Бу глобал оқибатларни юзага келтириши мумкин», — дея таъкидлайди Блинкен.

Москванинг Украинага нисбатан амалдаги сиёсатини у Киев «ислоҳотлар ва демократия йўлидан бораётгани» сабаб Россия уни «бутунлай йўқотишдан қўрқяпти» деб изоҳлаган.

Блинкен Россиянинг Ғарб билан муносабатларида «икки йўл» борлигини яна бир бор огоҳлантирган: дипломатия ва  «Украинага нисбатан амалга оширилган босқиннинг оқибатлари». Давлат котибининг сўзларига кўра, АҚШ ва унинг иттифоқчилари биринчисини танлайди, Россия билан яқинда ўтказилган музокаралар айнан шунга бағишланган эди. Блинкеннинг эслатишича, шу ҳафтада Вашингтон, шунингдек, НАТО Россия борасидаги хавотирларга жавоб қайтариши керак. Москванинг мазкур ҳужжатларга жавобан амалга оширадиган ҳаракати Россия дипломатик жараённи давом эттириш ёки эттирмаслигини кўрсатади.

Аввалроқ Зеленский АҚШ давлат котиби билан учрашувда Украина армиясини модернизация қилишда ёрдам сўрагани, Канада махсус кучларининг бир қисми Украинага жўнатилгани тўғрисида хабар берилганди. Шунингдек, НАТО Украина атрофидаги вазият сабаб қўшинларини жанговар шай ҳолатга келтирмоқда.