НАТО Украина яқинида Россия кучлари тўпланаётгани сабаб ўз қуролли кучларини жанговар шай ҳолатга келтирмоқда ва Шарқий Европага қўшимча кема ҳамда қирувчи самолётларни юборяпти, деб хабар беради «Интерфакс».
«Россия Украина ва унинг атрофида ҳарбий иштирокини кучайтиришни давом этар экан, НАТО иттифоқчилари ўз кучларини шай ҳолатга келтирмоқда ҳамда НАТОнинг Шарқий Европага қўшимча кема ва қирувчи самолётлар юборилиб, альянс мудофаасини кучайтирмоқда», — дейилади НАТО сайтида эълон қилинган баёнотда.
Таъкидланишича, сўнгги кунларда НАТОга аъзо қатор давлатлар қўшимча кучлар жойлаштирилгани ёки эндиликда бу ишни амалга оширишини эълон қилди. Баёнотга кўра, Дания Болтиқ денгизига фрегат юборади ва Литвага НАТОнинг минтақадаги ҳаво маконини кузатиш миссиясини қўллаб-қувватлаш учун тўртта F-16 қирувчи самолётини йўналтиради. Шунингдек, Испания альянс ҳарбий-денгиз кучларига ёрдам сифатида кемаларни юбормоқда ва Болгарияга қирувчи самолётларни жўнатиш имкониятини кўриб чиқяпти.
Бундан ташқари, Франция ўз қўшинларини НАТО қўмондонлиги остида Руминияга жойлаштиришга тайёрлигини билдирган. АҚШ эса Шимолий Атлантика альянсининг шарқий қисмидаги ҳарбийлари сонини ошириш масаласини кўриб чиқаётгани айтилмоқда.
НАТО, шунингдек, Нидерландия апрель ойидан бошлаб Болгарияга иккита F-35 қирувчи самолётини юборишини кутмоқда. Мамлакат шу билан бирга, НАТОнинг тезкор ҳаракат кучлари учун битта кема ва пиёда бўлинмасини юбориш ниятида.
Маълумотларга кўра, НАТОнинг альянс шарқий қисмида 2014 йилгача — Россия Қримни қўшиб олгунига қадар қўшинлари бўлмаган.
Аввалроқ Зеленский АҚШ давлат котиби билан учрашувда Украина армиясини модернизация қилишда ёрдам сўрагани, Канада махсус кучларининг бир қисми Украинага жўнатилгани тўғрисида хабар берилганди.
Изоҳ (0)