Буркина-Фасода ҳарбийлар мамлакат президенти Рок Марк Кристиан Каборени ҳокимиятдан четлатди ва ҳукуматни ўз назоратига олди. Бу ҳақда маҳаллий Lefaso янгиликлар портали хабар қилган.
Хабарга кўра, 14 нафар ҳарбийдан иборат гуруҳ давлат телеканалида тўғридан-тўғри эфирда чиқиш қилиб, ҳукумат бошқарувининг «Ҳимоя ва қайта тиклаш ватанпарварлик ҳаракати» ихтиёрига ўтганини эълон қилган. Тузилмага подполковник Пол-Анри Сандаого Дамиба раҳбарлик қилмоқда.
Ҳарбийлар Буркина-Фасо конституцияси бекор қилингани, ҳукумат ва парламент тарқатиб юборилгани, қуруқлик ва ҳаводаги давлат чегаралари ёпилганини маълум қилган.
Мамлакат ҳудудида комендантлик соати жорий этилган ва у 05:00 дан 21:00 гача амалда бўлади. Burkina24 портали мазкур маълумотлар ўрин олган ҳужжатга 41 ёшли подполковник Дамиба имзолагани ҳақида хабар берган.
Ҳарбийлар ҳукуматни эгаллаш зўравонлик ҳаракатларисиз амалга оширилгани, ҳибсга олинганлар хавфсиз жойда сақланаётганини билдирган.
«Ҳимоя ва қайта тиклаш ватанпарварлик ҳаракати» бугундан бошлаб Каборенинг президентлик даври тугаганини эълон қилади», – дея ҳарбий зобитларнинг сўзларидан иқтибос келтирган Reuters агентлиги.
Ҳарбийлар Каборе (у 2015 йил декабрида президентлик фаолиятини бошлаган) халқни бирлаштира олмагани ва хавфсизлик масалаларида таҳдидларга қарши тура олмаганини таъкидлаган.
Буркина-Фасода ҳарбийлар 23 январь куни бир қатор базаларда исён кўтарган ва 24 январга ўтар кечаси президент Каборе резиденциясига қуролли ҳужум уюштирилганди. Президентнинг қаерда тутқунликда сақланаётгани ҳақида маълумотлар берилмаган.
Бундан аввал 2021 йил ноябрда Буркина-Фасода полициячиларга уюштирилган ҳужум оқибатида 53 киши ҳалок бўлгани, декабрда жангариларнинг 40 дан ортиқ одамни ўлдиргани хабар қилинганди.
Изоҳ (0)