Халқ таълими вазирлиги ҳузуридаги Республика таълим маркази директори Шуҳрат Сатторов мактабларда 1—6-синфлар учун табиий фанлар (Science) жорий қилингани ва фанлар нима учун қўшилиб ўқитилиши ҳақида «Дарё» мухбирига қисқача интервью берди.
Шуҳрат Сатторовнинг айтишича, жорий этилаётган таълим дастури Буюк Британия тажрибаси асосида тайёрланган.
Эндиликда дарс соатлари ортидан қувмоқчи эмасмиз. Мақсад — ўқувчиларни ҳаётга тайёрлаш ва сифатга эришиш. Шу мақсадда 1—6-синфлар учун табиий (Science) фанлар жорий қилинди. Бу фанга география, биология, физика ва кимё қўшиб ўқитиладиган бўлди. Фанлар бирлаштирилди, лекин қисқартирилгани йўқ, — дейди Республика таълим маркази директори.Унинг алоҳида таъкидлашича, қуйи синфларда ўқитиладиган табиий фанларнинг асосий мақсади юқори синфдаги кимё, физика, биология дарслари учун пойдевор тайёрлаш.
Қуйи синфларда табиацҳунослик, атрофимиздаги олам каби дарсликлар ўқитилган. Лекин бу дарсликларни қайси бири ўзига хослиги билан ёдимизда қолган? Деярли ҳаммасида табиат яшил бўлиши, боғлар, ўрмонлар ҳақидаги, яъни юзаки маълумотларни эгаллаганмиз. Ўқувчи ‘нима, қачон, қаерда?’ деган саволга эмас, ‘нима учун бундай бўлди?’ деган саволга жавоб бериши керак. Яъни танқидий, ижодий фикрлаш кўникмаси билан вояга етиши керак, — деди Шуҳрат Сатторов.
Эслатиб ўтамиз, Миллий ўқув дастурига кўра, 2022/2023-ўқув йилидан бошлаб, 1–6-синфларда ягона табиий фанлар (Science) фани жорий қилиниши белгиланган. Янги фан география, биология, физика, кимё ҳамда астрономия фанлари бўйича ўқувчиларнинг дастлабки кўникмаларини шакллантиришга қаратилган.
Ижтимоий тармоқларда мактабларда география фанининг дарс соатларида ўзгаришлар бўлаётгани юзасидан эътирозлар тарқалди. Халқ таълими вазирлиги ҳолатга муносабат билдирди. Унда айтилишича, мактабда география фанидан берилиши зарур бўлган билим ҳажми ва унга умумий режада ажратилган соатлар ҳажми қисқаргани йўқ. «Шу нуқтаи назардан, ижтимоий тармоқларда география фани йўқолиш хавфи остида деган хулосалар асоссиз», — дея қайд этилади муносабатда.
Изоҳ (0)