Республика махсус комиссияси қарори билан халқаро аэропортлар, темир йўл вокзаллари ва автомобиль ўтказиш чегара пунктларида фуқаролардан коронавирус инфекциясига экспресс-тест олиш талаби бекор қилинди.
Қайд этилишича, 2022 йил 25 январдан хорижий давлатлардан Ўзбекистон Республикасига ташриф буюрувчиларнинг камида 48 соат олдин топширган коронавирус инфекциясига ПЗР тест натижаси бўйича манфий натижали маълумотнома мавжуд бўлган тақдирда, халқаро аэропортлар, темир йўл вокзаллари ва автомобиль (пиёдалар) ўтказиш чегара пунктларида ташкил этилган коронавирус инфекциясига экспресс-антиген тест топширишлари талаби бекор қилинади.
Эслатиб ўтамиз, 15 январдан бошлаб Ўзбекистон аэропортларида коронавирусга қарши мажбурий тест топшириш жорий этилганди. Ушбу тартиб ортидан йўловчиларга айрим муаммоларни келтириб чиқарди.
Хусусан, Тошкент халқаро аэропортида вирус тарқалиши хавфини оширган ҳолда тест олиш учун турнақатор навбатлар юзага келгани акс этган видеолар тарқалди. «Podrobno.uz»нинг ёзишича, бунга тест синовлари ўтказиладиган пунктлар ҳамда валюта айирбошлаш шохобчалари етарли эмаслиги сабаб бўлган.
Изоҳ (0)