Қозоғистондаги намойишлардан сўнг Назарбоевнинг учинчи куёви ҳам истеъфога чиқди

Қозоғистон биринчи президенти Нурсултон Назарбоевнинг куёви Тимур Кулибаев «Atameken» миллий тадбиркорлар палатаси раҳбари лавозимини тарк этди. Бу ҳақда Кулибаев палата сайтига жойланган баёнотда эълон қилган.

«Бугундан бошлаб мен ‘Atameken’ миллий тадбиркорлар палатаси президиумининг сайланган раиси лавозимини тарк этишга қарор қилдим. Миллий тадбиркорлар палатасининг олий назорат органига саккиз йил раҳбарлик қилиш мен учун катта шараф ва масъулият бўлди», — дейди Кулибаев.

Унинг таъкидлашича, шу вақт ичида бизнес ва ҳукумат ўртасида конструктив мулоқот йўлга қўйилган ва қулай ишбилармонлик муҳити изчил шакллантирилган.

Кулибаев Нурсултон Назарбоевнинг ўртанча қизи Динара билан оила қурган.

Аввал Қозоғистон биринчи президентининг яна икки куёви нефть-газ соҳасига оид йирик компаниялардаги лавозимини тарк этганди. Назарбоевнинг кенжа қизи Алиянинг турмуш ўртоғи Димаш Дўсанов «КазТрансОйл» бош директори лавозимидан, тўнғич қизи Дариғанинг «эри» Ғайрат Шарипбаев эса «ҚазақГаз Миллий компанияси» АЖ бошқаруви раиси лавозимидан истеъфога чиққан.

Уларнинг истеъфоси сабабларига аниқлик киритилмаган. Бу ҳақда эълон қилинган релизда ушбу қарорлар компанияларнинг директорлар кенгаши томонидан қабул қилингани айтилган, холос.

Шунингдек, Нурсултон Назарбоевнинг яна бир қариндоши истеъфога чиққани ҳақида хабар берилди. Мамлакатнинг амалдаги президенти Қосим-Жўмарт Тўқаев Назарбоевнинг жияни, Миллий хавфсизлик қўмитаси раҳбарининг биринчи ўринбосари генерал-лейтенант Самат Абишни лавозимидан озод этиш ҳақидаги фармонни имзолаган.

Аввалроқ МХҚ матбуот хизмати Абишнинг йиллик таътилга чиққанини, аммо ўз лавозимида фаолият юритишда давом этаётганини маълум қилганди.

Эслатиб ўтамиз, Қозоғистон Миллий хавфсизлик қўмитасининг собиқ раиси Карим Масимовга нисбатан давлатга хиёнат бўйича судга қадар тергов иши олиб борилмоқда. Масимовдан ташқари қўмита раисининг икки собиқ ўринбосари ҳам ҳибсга олинган.

Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар тартибсизликларга айланди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Қозоғистондаги тартибсизликлар фонида мамлакат бўйлаб фавқулодда ҳолат эълон қилинган. 6 январда Коллектив Хавфсизлик Шартномаси Ташкилоти (КХШТ) тинчликпарвар кучлари Қозоғистонга жўнатди. 7 январда мамлакат президенти Қосим-Жўмарт Тўқаев Қозоғистонда конституциявий тартиб тикланганини эълон қилди ва мамлакат бўйлаб террорчилик хавфининг юқори даражаси жорий этилди.

Норозилик намойишлари фонида 5 январь куни Тўқаев Назарбоевнинг ўрнига Хавфсизлик кенгашини бошқаришга киришди. Назарбоев умрининг охиригача мазкур лавозим ваколатларига эга эди. Кейинроқ унинг матбуот котиби Айдос Укибай Назарбоев Хавфсизлик кенгаши раҳбарлигини ўз ихтиёри билан топширганини маълум қилди.